Thomas Aquinas, In IV Sententiarum – In Libros Sententiarum

Posita enim causa ponitur effectus. Sed posita resurrectione christi non est secuta statim resurrectio aliorum mortuorum. Ergo resurrectio ejus non est causa nostrae resurrectionis.

Argumentum 2

Praeterea, effectus non potest esse nisi causa praecesserit. Sed resurrectio mortuorum esset, etiamsi christus non resurrexisset; erat enim alius modus possibilis deo ut homo liberaretur. Ergo resurrectio christi non est causa nostrae resurrectionis.

Argumentum 3

Praeterea, idem est factivum unius in tota una specie. Sed resurrectio erit omnibus hominibus communis. Cum ergo resurrectio christi non sit causa sui ipsius, non erit causa aliarum resurrectionum.

Argumentum 4

Praeterea, in effectu relinquitur aliquid de similitudine causae. Sed resurrectio, ad minus quorumdam, scilicet malorum, non habet aliquid simile resurrectioni christi. Ergo resurrectionis illorum non erit causa resurrectio christi.

Sed Contra 1

Sed contra, illud quod est primum in quolibet genere, est causa eorum quae sunt post, ut patet in 2 metaph.. Sed christus ratione suae resurrectionis corporalis dicitur primitiae dormientium 1 Cor., 5, et primogenitus mortuorum Apoc. 1. Ergo sua resurrectio est causa resurrectionis aliorum.

Sed Contra 2

Praeterea resurrectio christi magis convenit cum nostra resurrectione corporali quam cum resurrectione spirituali, quae est per justificationem.

Sed resurrectio christi est causa justificationis nostrae, ut patet Rom. 4, 25: resurrexit propter justificationem nostram. Ergo est causa nostrae resurrectionis corporalis.