Thomas Aquinas, In IV Sententiarum – In Libros Sententiarum

Ulterius. Videtur quod vox tubae non sit causa resurrectionis nostrae. Dicit enim Damascenus: crede resurrectionem futuram divina voluntate, virtute et nutu.

Ergo cum haec sint sufficiens causa resurrectionis, non oportet ponere causam ejus vocem tubae.

Argumentum 2

Praeterea, frustra vox emittitur ad eum qui audire non potest. Sed mortui non habebunt auditum.

Ergo non est conveniens quod vox aliqua formetur ad resuscitandum eos.

Argumentum 3

Praeterea, si vox aliqua sit causa resurrectionis, hoc non erit nisi per virtutem divinitus voci datam; unde super illud psalm. 67, 34: dabit voci suae vocem virtutis, dicit Glossa, resuscitandi corpora. Sed ex quo potentia data est, quamvis alicui miraculose detur, tamen actus qui sequitur, est naturalis; sicut patet in caecis miraculose illuminatis, qui naturaliter vident. Ergo si vox aliqua esset causa resurrectionis, resurrectio esset naturalis; quod falsum est.

Sed Contra 1

Sed contra est quod dicitur 1 thessal. 4, 15: ipse dominus... In tuba dei descendet de caelo, et mortui qui in christo sunt, resurgent primi.

Sed Contra 2

Praeterea, joan. 5, 25 et 28 dicitur: qui in monumentis sunt, audient vocem filii dei; et qui audierint, vivent. Haec autem vox dicitur tuba, ut in littera patet. Ergo etc..