Thomas Aquinas, In IV Sententiarum – In Libros Sententiarum

Delectatio enim ad affectum pertinet. Sed activa vita ex rectitudine voluntatis dependet; contemplativa vero magis consistit in perfectione intellectus.

Ergo delectatio in operibus activae est potior delectatione quae est in operibus contemplativae.

Argumentum 2

Praeterea, delectationis causa est operatio connaturalis habitus. Sed habitus virtutum Moralium, quae perficiunt in activa, magis movet per modum naturae quam habitus intellectualium virtutum: sciens enim sine difficultate potest aliquod falsum considerare; sed justus non potest sine difficultate operari injusta, ut dicitur Lib. 9 ethic..

Ergo delectatio virtutum Moralium, quae ad activam pertinent, est potior delectatione intellectualium, quae pertinent ad contemplativam.

Argumentum 3

Praeterea, convenientia est ratio delectationis.

Sed delectatio magis convenit cum virtute morali quam cum intellectuali; et virtutem et malitiam moralem circa delectationem et tristitiam ponimus, ut dicitur in 2 et 7 ethic.. Ergo delectatio activae potior est delectatione contemplativae.

Sed Contra 1

Sed contra, operationibus contemplativae non admiscetur amaritudo aut taedium; unde Sap. 8, 16: non habet amaritudinem conversatio illius, scilicet sapientiae: nec taedium convictus illius. Sed operationes activae vitae sunt multis amaritudinibus respersae. Ergo delectationes contemplativae vitae sunt potiores.

Sed Contra 2

Praeterea, quanto aliqua operatio est delectabilior, tanto magis potest continuari. Sed operatio contemplationis maxime potest continuari, ut dicitur in 10 ethic.. Ergo operatio contemplationis est maxime delectabilis.