338. (1. ) Rhythmus Herradis abbatissae,

per quem Hohenburgenses virgunculas amabiliter salutat et ad veri

sponsi iidem dilectionemque salubriter invitat.

1. Salve, cohors virginum Hohenburgiensium, Albens quasi lilium, Amans Dei filium.

2. Herrat devotissima, Tua fidelissima Mater et ancillula, Cantat tibi cantica.

3. Te salutat millies Et exoptat in dies, Ut laeta victoria Vincas transitoria.

4. 0 multorum speculum, Sperne, sperne saeculum, Virtutes adcumula, Veri sponsi turmula.

5. Insistas luctamine Diros hostes sternere, Te rex regum adiuvat, Quia te desiderat.

6. Ipse tuum animum Firmat contra zabulum, Ipse post victoriam Dabit regni gloriam.

7. Te decent deliciae, Debentur divitiae, Tibi caeli curia Servat bona plurima.

8. Christus parat nuptias Miras per delicias, Hunc exspectes principem Te servando virginem.

9. Interim monilia Circumdes nobilia Et exornes faciem Mentis purgans aciem.

10. Christus odit maculas, Rugas spernit vetulas, Pulchras vult virgunculas, Turpes pellit feminas.

11. Fide cum turturea

Sponsum istum redama, Ut tua formositas Fiat perpes claritas.

12. Vivens sine fraudibus Es monenda laudibus, Ut consummes optima Tui gradus opera.

13. Ne vacilles dubia Inter mundi flumina, Verax Deus praemia Spondet post curricula.

14. Patere nunc aspera

Mundi spernens prospera, Nunc sis crucis socia, Regni consors postea.

15. Per hoc mare naviga Sanctitate gravida, Dum de navi exeas, Sion sanctam teneas.

16. Sion turris caelica, Bella tenens astria, Tibi fiat statio Acto vitae spatio.

17. Ibi rex virgineus Et Mariae filius Amplectens te redamat, A maerore relevat.

18. Parvipendens omnia Tentatoris iacula Tunc gaudebis iugiter Iubilando suaviter.

19. Stella maris fulgida, Virgo mater unica, Te coniungat filio Foedere perpetuo.

20. Et me tecum trahere Non cesses precamine Ad sponsum dulcissimum, Virginalem filium.

21. Ut tuae victoriae, Tuae magnae gloriae Particeps inveniar. De terrenis eruar.

22. Vale, casta contio, Mea iubilatio, Vivas sine crimine, Christum semper dilige.

23. Sit hic liber utilis, Tibi delectabilis Et non cesses volvere Hunc in tuo pectore.

24. Ne more struthineo Subrepat oblivio Et ne viam deseras, Antequam pervenias.