940 Acta Apostolicae Sedis - Commentarium Officiale

TAURINENSIS

Beatificationis et Canonizationis Servi Dei Silvii Dissegna Pueri (1967-1978)

DECRETUM SUPER VIRTUTIBUS

« Laudate, pueri Domini, laudate nomen Domini » ( Ps 112, 1).

Praeceptum hoc antiqui psalmistae Israelis aetati callide adhaeret Servi

Dei Silvii Dissegna, qui brevi tempore duodecim modo annorum vere Do-

minum plenius valuit laudare.

Servus Dei die 1 mensis Iulii anno 1967 Monte Calerii prope Augustam

Taurinorum in Italia, primogenitus ex filiis Octavii et Gabriellae Martignon

coniugum, ortus est. Sub apte cohaesum adolevit larem, ubi parentes firma

eundem simul et Carolum post annum natum fratrem christiana ornaverunt

institutione ac disciplina, quam dein et scholae magistrae et catechistae

paroeciae magis etiam cumularunt. Silvius ergo non modo vividus, sed bo-

nus fuit puer, studii diligentia, mansuetudine et oboedientia eminens, qui

amicos ludosque corporisque exercitationes lectionemque valde dilexit ac

deambulationes. In posterum sane se, ut aliis rerum novarum agnitionis

decus traderet, magistrum fieri expetebat.

Die 7 mensis Septembris anno 1975 primam Communionem in vico v. d.

Poirino intra moenia cappellae familiari domicilio adnexae una cum fratre

recepit. Silvius iam intimam vivebat necessitudinem cum Iesu privata ora-

tione Missaeque hebdomadali participatione fidelitateque parva erga aetatis

suae puerilis officia ac suavi candidaque benignitate in omnes suffultam.

Undecim annos natus, verno tempore anni 1978, saevo morbo aegrotavit,

nec ullam medicorum sententia spem aluit salutis, cum tumorem ossium

miserrime ipsi perspexissent. Coram his autem Silvius neque diffisus est

neque ullomodo cessit, sed fide suffultus diutinam diramque Viam Crucis

suam pulsavit Iesu cruce oneratus eidemque affixus omnino conformatus

et cotidiana Communione eucharistica enutritus, cruciatus suos et vitam

ipsam divino Patri pro salute iugiter offerens mundi. Suppeditatae quae

sollicite fuerunt ad refrenandum morbum curae, praeter dolores, adusque

septem tulerunt recessus in valetudinario Parisiensi illo eximii viri Gustavi

Roussy nomini inscripto pro peculiaribus remediis quibuscumque tumoribus

laboratis ministrandis. Servus Dei lumina vero et aures paulatim amisit,