930 Acta Apostolicae Sedis - Commentarium Officiale

SANCTI MINIATI

Beatificationis et Canonizationis Ven. Servi Dei Pii Alberti Del Corona ex Ordine Fratrum Praedicatorum Episcopi Sancti Miniati Fundatoris Congregationis Sororum

Dominicanarum a Sancto Spiritu (1837-1912)

DECRETUM SUPER MIRACULO

Servus Dei Pius Albertus Del Corona Labrone die 5 mensis Iulii anno

1837 natus est. Ad Christi praecepta institutus, decimum et septem annum

aetatis agens vocationem ad vitam regularem percepit, hac re iuxta Fratrum

Praedicatorum venerabile Florentinum coenobium Sancti Marci receptus est.

Die 5 mensis Februarii anno 1860 sacro ordine exornatus est. Virtute et

doctrina valde existimatus, sollicite ad praedicationem, ad institutionem et

ad spiritualem moderationem omnino se contulit. Anno 1872 Asilum Petrae,

v.d. L'Asilo della Pietra, ad pauperum mulierum saecularem et spiritualem

institutionem necnon Congregationem Sororum Dominicanarum a Sancto

Spiritu fundavit. Eodemque anno prior Sancti Marci electus est, studia

theologica ac philosophica increbuit et multos libros edere valuit. Sancti

Miniati Episcopus nominatus, die 3 mensis Ianuarii anno 1875 episcopali

dignitate rite exornatus est. Summo animo munus pastorale ab eo suscipie-

batur, crebris visitationibus in valetudinariis, carceribus et in monasteriis,

Servus Dei varias epistolas scripsit et maxime sacerdotibus et fidelibus totis

viribus prospexit pauperesque ante omnes curavit. Diurna consuetudo ei fuit

virtutum exercitium tam consecrata in vita quam in episcopali officio, haec

omnia semper ostendit: singularissima dona sapientiae, spiritus orationis

et rerum humanarum contemptionis, apostolicae sedulitatis, humilitatis,

austeritatis, integritatis, exemplaris vitae, amoris in Deum, certa concordia

et caritas in proximum. Die 15 mensis Augusti anno 1912 pie in Domino

quievit, postquam hunc diem extremum suum predixerat. Summus Pontifex

Franciscus die 9 mensis Octobris anno 2013 virtutes heroicas eius agnovit.

Beatificationis respectu, Causae Postulatio iudicio istius Congregationis

de Causis Sanctorum miram quandam monialis sanationem subiecit, quae

anno 1926 Labrone evenit. Soror vigesimum tertium annum aetatis agens

vehementissimos dolores abdominis percipere incepit, una cum patologicis

casibus vomitationis, cibi fastidiis et nauseis. Exagente tempore etiam cu-