Acta Congregationum 941

non autem omnium conscientiam eventuum, cum morbus intellectus facul-

tatem corripuisset nullam. Die 21 mensis Maii anno 1978, super sellam

rotularum ope instructam iam coactus, una cum sociis in ecclesia paroeciali

Poirinensi Confirmationis recepit sacramentum, cuius fortitudinis gratia

summo suipsius patientiae testimonio Viam Crucis veram cum Iesu vivere

et pro animarum salute passiones suas offerre valuit. Caritate provectus,

voluntatem Dei ad imum suscipere voluit et ad Christi regni augmentum

actuose conferre.

A die 4 mensis Iunii anno 1978 Communionem cotidie domi recipere

quaesiit. Longis et pigris horis doloris illis die noctuque marialem coronam

in manu tenens assidue orabat et, intercessionem Beatae Mariae Virginis

invocans passionem suam pro Ecclesia, pro caris et universo mundo et pec-

catorum conversione iugiter offerebat. Vitas sanctorum atque parvolorum

pastorum Fatimae petebat legendas et, cum amici atque noti pro adiuvanda

familia collationem nummariam instituerunt, Silvius a parentibus rogavit, ut

summam pro extruendo oratorio paroeciae largirentur. Admodum sibi cons-

cius ac sacris mysteriis refectus, Servus Dei die 24 mensis Septembris anno

1978, in memoria Beatae Mariae Virginis a Mercede pie in Domino quievit.

Exsequiis insequenti die 26 mensis Septembris celebratis in ecclesia

paroeciali Poirinensi triginta interfuerunt presbyteri concelebrantes sacris

albis vestibus induti, qui sponte illuc congregati elatae iam admirationis

praebuerunt testimonium. Exuviae eius apud coemeterium municipale re-

positae sunt. Vita huius adulescentuli Evangelii testis sancta citius post

eiusdem mortem adeo pervulgata est, ut Silvius speculum pueri eximie re-

censeretur non modo morum causa, quibus aetatem suam vixit, sed propter

evangelicam ipsam conversationem, qua infirmitatem et virtutes christianas

in seipso suscepit.

Hanc ob celebratam sanctitatis famam, Causa Beatificationis et Cano-

nizationis apud Curiam Archiepiscopalem Taurinensem inita est per cele-

brationem Inquisitionis dioecesanae a die 8 mensis Februarii anno 1995

ad diem 25 mensis Octobris anno 2001, cuius auctoritas et vis iuridica ab

hac Congregatione de Causis Sanctorum primum die 8 mensis Novembris

anno 2001 probatae sunt. Positione confecta, die 5 mensis Novembris anno

2013 in Congressu Peculiari Consultorum Theologorum prospero cum exitu

disceptatum est, iuxta consuetudinem, an Servus Dei more heroum virtutes

christianas exercuisset.