1244 Acta Apostolicae Sedis - Commentarium Officiale

Summam humilitatem est complexa, sic sua in vita mysteria sancti Rosarii vivens, quin diceret se esse fundatricem, omnino confessario oboediens, quem omnes putabant conditorem. Patientissime difficultates toleravit, cum parva communitas celeriter cresceret. Die X mensis Maii anno MDCCCXCVII laetata est cum regulam a Patriarcha comprobatam videret. Complura mu- nia et officia obivit: Ioppe, Beit Sahur, Neapoli Palaestinae, Zobabdech, Bethleem, Ierusalem ac tandem Ain Karem, ubi usque ad mortem mansit. Assidua cum Deo coniunctione vitam exegit per continuatam precationem atque per Eucharistiam saepe receptam, quod illo tempore erat insolitum, eximia cum fide ac pietate. Apud ceteras sorores ac populum alta humi- litate, silentio, vita abscondita, patientia atque facultate se sine limitibus donandi eminebat. Cum iam vivens sanctitatis fama frueretur, eius tantum post mortem atque ipsius diaria edita eius magnitudo exstitit et spectabilia mystica dona sunt patefacta, quae abscondere sororibus usque curavit, sicut haud curavit ut fundatrix haberetur. Die XXV mensis Martii anno MCMXXVII pie obiit, dum rosarium cum sororibus precaretur.

Perstante sanctitatis fama augescenteque apud Dei populum, anno MCMXXXIII Ierusalem canonicus Processus constitutus est. Theologi Consul- tores, in Congressione die XIV mensis Iunii anno MCMXCIV coadunati, de virtutibus heroum in modum exercitis faventem sententiam tulerunt atque idem iudicarunt Patres Cardinales et Episcopi in Sessione Ordinaria die XXII mensis Novembris anno MCMXCIV coadunati. Summus Pontifex sanctus Ioannes Paulus II die V mensis Decembris eiusdem anni Decretum edidit. Ad beatificationem assequendam putata mira sanatio exhibita est, quam Medici Consultores Congregationis de Causis Sanctorum, die XXIX mensis Novembris anno MMVII coadunati, ad scientiam inexplicabilem iudicarunt. Theologi Consultores, in Congressione peculiari die XXIII mensis Maii anno MMVIII coadunati, eam Venerabilis Servae Dei intercessioni tribuerunt atque idem senserunt Patres Cardinales et Episcopi in Sessione Ordinaria die XXVIII mensis Aprilis anno MMIX. Summus Pontifex Benedictus XVI facultatem fecit ut Congregatio de Causis Sanctorum Decretum super miro die III mensis Iulii anno MMIX evulgaret atque statuit ut beatificationis ritus in Basilica Annuntiationis Nazareth die XXII mensis Novembris anno MMIX celebraretur.

Canonizationis causa ab electrica fulguratione sanatio exhibita est, quae mira est putata. Eandem ad scientiam inexplicabilem putarunt Consultores Medici Congregationis de Causis Sanctorum die XII mensis Maii anno MMXIV Theologi Consultores, in Congressi peculiari die XXV mensis Septembris anno MMXIV coadunati, eam intercessioni beatae Mariae Alfonsinae tribuerunt