215. (5). In Resurrectione Domini.

1. Chorus novae Ierusalem Novam meli dulcedinem Promat colens cum sobriis Paschale festum gaudiis.

2. Quo Christus, invictus leo, Dracone surgens obruto, Dum voce viva personat, A morte functos excitat.

3. Quam devorarat improbus, Praedam refundit tartarus, Captivitate libera Iesum sequuntur agmina.

4. Triumphat ille splendide Et dignus amplitudine, Soli polique patriam Unam fecit rempublicam.

5. Ipsum canendo supplices Regem precemur milites, Ut in suo clarissimo Nos ordinet palatio.

6. Per saecla metae nescia Patri supremo gloria Honorque sit cum filio Et spiritu paraclito.