220. (10). Prae Gaudio Pacis.

1. Sanctum simpliciter Patrem cole, pauperum caterva, Quantumque nosti, laudibus honora,

2. Ad normam redigit qui subdita saecla pravitati, Potens novandi sicut et creandi

3. Et, grave damnate, longi tibi subvenit laboris Opem ferendo pacis et quietis.

4. Iam proceres legum rationibus ante desueti, Quae recta discunt, strenue capessunt.

5. Praedo manum cohibet furcae memor, et latrone coram Inermis alte praecinit viator,

6. Dente saturnali restringitur evagata vitis Cultuque tellus senta mansuescit.

7. Gaudet lancea falx, gaudet spata devenire vomer, Pax ditat imos, pauperat superbos.

8. Salve, summe pater, fer et omnibus integram salutem, Quicunque pacis diligunt quietem.

9. At, qui bella volunt, hos contere dextera potenti, Tradens gehennae filios maligni.