1. In Nativitate Domini.

1 a. Divino balsamo

Mundus inungitur,

Dum sacro thalamo
Sponsus egreditur,

Quod David calamo
Veloci scribitur.

1 b. Nectar angelicum
In terris bibitur,

Et manna mysticum
De caelis mittitur,

Gratiae canticum
Ubique canitur.

2 a. In nostro vespere
Oriens oritur,

Vera de palmite
Vitis progreditur,

De suo opere
Opifex editur.

2 b. De patris solio

Sputum emittitur,

In terrae medio
Lutum conficitur,

Tali collyrio

Lux caelo redditur.

3 a. Miranda saeculo

Res summa geritur,

Dum sine masculo
Partus concipitur

Et clauso vasculo
Pudoris nascitur.

3 b. Ineffabiliter

Deus ingreditur
Et mirabiliter

Homo efficitur,
Nec sic nec aliter

Pudor amittitur.

4 a. Sub nube latuit

Sol veri luminis,

Dum formam induit
Humani tegminis,

Quem Deus genuit,
Consors est hominis.

4 b. Non novit ratio

Conceptum virginis

Aut, quae sit unio
Dei et hominis,

Totum est actio
Superni numinis.

5 a. Pastor pastoribus
Natus apparuit,
Et de caelestibus

Hymnus innotuit,
Quo nihil dulcius
Audiri potuit.

5 b. Complutum caelitus
Vellus immaduit,

Eos sancti spiritus
Virginem compluit,

Et sic divinitus
Venter intumuit.

6 a. Latet in angulo,

Qui regit aetbera,

Vagit in stabulo,
Quo gaudent supera,

Nutritur pabulo,
Quo vivunt cetera.

6 b. O virgo virginum,
Nova puerpera,

Precare Dominum
Et nato impera,

Dei et hominum
Fac in te foedera;

7. Ad patrem luminum
Nos fer post funera.