Coll. I. De pusillo grege multiplicando.

Confortamini, charissimi, et gaudete in Domino, nec, quia pauci estis, efficiamini tristes, nec vos terreat mea vel vostra simplicitas, quoniam, sicut a Domino mihi in veritate ostensum est, in magnam multitudinem faciet vos crescere Deus suaeque benedictionis gratia multipliciter dilatabit. Multi convertentur ad Dominum, et per universum mundum multiplicabit Deus familiam suam et augebit. Ad vestrum quoque profectum cogor dicere, quod vidi, quod utique magis silere liberet, si charitas me non cogeret vobis referre. Vidi multitudinem magnam hominum ad nos venientium et in habitu sanctae conversationis nobiscum volentium conversari. Et ecce adhuc sonitus eorum in auribus meis euntium et redeuntium secundum obedientiae sanctae mandatum. Vidi quasi vias ipsorum multitudine plenas ex omni fere natione in his partibus convenire. Veniunt Francigenae, festinant Hispani, Teutonici et Anglici currunt, et aliarum diversarum linguarum accelerat maxima multitudo.,