2. De Passione Imaginis.

In 1. Vesperis.

Ad Magnificat.

A. Omnes diligant ardenter
Opere et veritate
Jesum Christum creatorem,
Quem in mundum misit pater
Larga tractus caritate,
Nostrum verum salvatorem.

Ad Matutinum.

Invitatorium.

Adoremus Deum Jesum,
Sanctac Mariae filium.

In 1. Nocturno.

Antiphonae.

1. Genitus a Deo patre
Virgineque semper matre
Factus est mundi salvator,
Qui jam erat et creator.

2. Non est sub coelo alius
A Christo redemptore,
Quo quis salvari valeat,
Et coeli largitore.

3. Montem sanctum dicimus
Christum salvatorem,
A patre quem accepimus
Gratiae datorem.

Responsoria.

1. Salvator Christus Dominus,

Deus et homo verus,

Cupit homines salvari

Et ad agnitionem

Verae fidei vocari,

Unde Jesus salutaris

Debet nominari.
V. Ipse siquidem populum,

A peccatis salvans suum

Coelo situavit.

2. Lapis de monte jam sancto
Sine manibus praecisus
Est salvator noster Christus,
De virgine jam natus,
Quo ut David Philistaeum
Daemonem convincimus;

V. Factus est namque salvator
Christus angularis lapis.

3. Propter Dei patris caritatem

Nimiam venit nobis

Ejus unigenitus

Virginisque natus,

Sua passione,

Jam quod perierat,

Cupiens salvare.
V. Dum imago salvatoris

In Beryto percutitur,

Tunc sanguis pretiosus

Largiter effunditur.

In 2. Nocturno.

Antiphonae.

1. Salvatoris gratia
Evidenter patet,
Dum in Beryto passio
Christi jam non latet.

2, Imago percutitur
Nostri salvatoris,
Sic sanguis effunditur
Non parvi valoris.

3. Baptizantur gloria
Christi salvatoris
Sic undam venerantes
Tam sancti cruoris.

Responsoria.

1. Dum imago salvatoris
A Judaeis est percussa,
Sanguinem effudit verum
Velut olim aquam petra,

V. Salvatoris enim festum

Recte nunc indicitur,

Cum sanguis de imagine

Ejus jam effunditur.
2. Si opus adspicimus

Christi creatoris,

Merito ecclesiae

Salvatoris nomine

Dedicantur multae,

Mortis namque tempore

Et demum de imagine

Sanguinem effudit,
V. Per quem victo daemone

Populum redemit.
3. Salvatorem nostrum Jesum

Christum agnoscamus,

Et ut sit propitius,

Mente recolamus

Ejus beneficia

Et omnia, quae fecerit

Nobis permagnifica.
V. Redemit nos in sanguine

Suo regnum et sacerdotes

Gratis faciens.

In 3. Nocturno.

Antiphonae.

1. A salvatore Domino
Miracula patrantur,
Et propter hoc ecclesiae
In mundo consecrantur.

2. Per Jesum Christum Dominum,
Nostrum salvatorem,
Vere salvari credimus,
Non per nostrum vigorem.

3. Clamaverunt patres justi
Ferventi amore
Et certe sunt salvati
Christo redemptore.

Responsoria.

1. Lux vera, Christus Dominus,
Salvator advenit,
Plus quam ignis per desertum
Populum secernit,

Et quemlibet illuminans
Docuit utilia,

Omnibus jam suis praestans
Multa beneficia.
V. Qui salvatorem sequitur
Habebit vitae gratiam
Et lumen indeficiens.

2. Agnus sine macula,
Salvator Jesus dicitur,
Qui solvens, quod non tulit,
Daemonemque vincens
Populum redemit.

V. Obediens Deo patri
Virginique sponte matri
Mortem crucis pertulit.

3. Salvator Deus Christe,
Qui natus matre virgine
Mortem pertulisti
Et a mortuis resurgens
Coelos ascendisti,
Sanguinem in Beryto
Fundens de tua imagine
Tuo dotasti munere,
Digneris nos salvare
In tuis laudibus
Congregatos hodie.

V. Christum Deum agnoscentes
Salvatoremque credentes
Invocamus conclamantes.

In Laudibus.

Antiphonae.

1. Collaudemus pariter
Jesum salvatorem
Et coelestis gloriae
Suis largitorem.

2. Digneris, salvator Christe,
A malo nos salvare,
Ut per tuam pietatem
Colamus trinitatem.

3. Auctor boni Dominus
Ipse est salvator,
Sit nobis propitius
Vitaeque donator.

4. Salvat Christus humiles,
Qui eum sequuntur
Et bonis assidue
Ejus perfruuntur.

5. Justorum angustiae
Multae asseruntur,
Salvat illos Dominus,
Qui Jesum sequuntur.

Ad Benedictus.

A. Benedictus sit Dominus,
Salvator noster Christus,
Qui genitus aeterne,
Conceptus est ex virgine,
Homo factus in tempore,

Ut plebem suam salvaret
Et superis sociaret,
Hinc et laus et gloria
Illi sunt in saecula.

In 2. Vesperis.
Ad Magnificat.
Populus fidelium
Berytensis credidit
Jesum Christum creatorem
Et salvatorem omnium,
Qui populo donavit
De sua imagine
Charismata
Ipsamque salvavit,
Ideo ejus nomini
Ecclesias sacravit.