43. De sancto Jacobo.

Ad Laudes.

Antiphonae.

1. Immensi regis filius sororis et matris,

Apostolus Jacobus Alphaei, qui dicitur Justus,
Cujus noster laetus celebret solemnia chorus.

2. Famulum, ecce, Dei credit esse populus fratrem
Sanctitatis merito et castitatis odore,
Cujus certatim fimbriam tangere gaudebant.

3. Post mortem Christi Jacobus electus est iste
Primus in episcopum Solymorum ab omnibus una
Apostolis, merito sanctitatis vitaeque dictante.

4. Gaudeat ecclesia tanto ditata praelato,
Qui meruit primus mysteria sancta tractare
Et solus populi corda acquisivit virtute.

5. Laudibus est multis Jacobus honorandus Alphaei,
Qui totiens genua orando flexit in templo,
Quod callos in eis habuit ad modum cameli.