5. In Visitatione Beatae M. V.

1 a. Salvae virginis Mariae
Et matris clementiae

Veneretur in hac die
Unicornis gratiae,

Festum domus Zachariae
Honor sit ecclesiae.

1 b. Fecunditas virginea
Sterili congreditur,

Et alti regis filia
Mater clam efficitur,

De una stirpis linea
Insigne progreditur.

2 a. Venerabilis persona

Praeminens non latuit,

Quae non, aliena bona
Ut videret, adfuit,

Digne quoque sua dona
Audire promeruit.

2 b. Sine voce exsultavit

Verbi vox praeconio,
Et Elisabeth expavit

Viso mox mysterio,
"Benedicta tu" clamavit
"Cum fructu in gremio."

3 a. "Unde mihi, caeli rore

Quae concepit Dominum,
Virginali cum pudore

Paritura filium,
Meae proli Iesse flore
Intulisti gaudium ?"

3 b. Non in gloriam erexit
Haec oblata gloria,
Vera humilis reflexit
Sed in eum omnia,
Ad ancillam qui respexit
Fecitque magnalia.

4 a. Pio placet demorari
Insuper officio,
Post Rachelem famulari

Liae exercitio
Nec personam minorari
Putat ministerio.

4 b. Stella, luce aeternali

Quae immersa crederis,

Quantum sine personali
Unione pateris

Et in mari mundiali
Iugiter aspiceris.

5. Inconsuta non scindatur

Filii tunicula,
Tempestate non mergatur

Simonis navicula,
Contra cuncta dirigatur

Per te hic pericula.