7. In Dedicatione Ecclesiae.

1. Laudes Deo modulemur,
Nos qui Deo confitemur,
Quia fecit omnia.

2 a. Vox dulcescat
Nec lassescat,
Vox sublimis
Nos ab imis

Levet ad sublimia.

2 b. Inconcinnus

Non est hynnus,
Cum vox mentem
Concinentem
Habet in symphonia.

3 a. Reddat Deo, quod est Dei,
Quisquis digna novit ei,

Et hoc in ecclesia ;
Extra certe

nostram catholicam
Victimaret labem haereticam

Et contemptibilia.

3 b. Unus unum habet gratum,
Quod in una est oblatum,

Et haec placet hostia,
Si te prius voveas
Et talem exhibeas,

Ut sis dignus gratia.

4 a. Unam domum habet Deus,
Ad quam fugit quisque reus
Actus paenitentia;

4 b. Illa domus est et sponsa,
Nec est brevis sed protensa
Per terrarum spatia.

5 a. Unam Deus sponsam amat,
Unam suam esse clamat,
Uni dat sponsalia:

5 b. Sexaginta sunt reginae,
Octoginta concubinae,
Uni cedit regia.

6 a. Illam Deus praesignavit,
Cum per Evam reformavit
Lateris dispendia ;

6 b. Eva viro dormiente,
Nostra Christo moriente
Processit ecclesia.

7 a. Hanc in petra dormientis
Et de scala pavescentis
Prophetabant somnia:

7 b. Iam tunc lapis ungebatur,
Iam haec domus dicebatur
Et caelestis ianua.

8 a. Haec est arca salutaris
Quae per aquas acta maris
Conservavit omnia,

8 b. Cuius portam habet latus,
Per quod Christus lanceatus
Vitae pandit ostia.

9 a. Hanc ditandam etornandam
Veris bonis Salomonis
Dicebant mysteria,

9 b. Cum rex idem fecit pridem
Ad exemplum huius templum
Et eius sollemnia.

10 a. Haec est pacis urbs et vitae,
Cuius portae margaritae,
Cuius forum sine lite,
Cuius Deus gloria.

10 b. Cuius agnus est lucerna,
Per quam imis ad superna
Fecit viam lex aeterna
Pro sua clementia.

11a. Urbs sublimis, urbs serena,
Felix sedes et amoena,
Expers mortis, vitae plena,
Vitae vera gaudia,

11b. Tu servatae castitatis,
Tu cruore purpuratis,
Tu utroque consecratis
Reddis vera praemia.

12 a. Nos a valle, qua ploramus,
Sub hoc fasce, quem portamus,
Te a longe suspiramus,
Suspirando salutamus,
Esto nobis patria.

12 b. In te regem videamus,
Sub quo bene militamus,
In quo pacem habeamus
Et in pace concinamus
Iucundum Alleluia.