8. De Beata Maria V.

Ad Matutinum.
Invitatorium.

Jesum, qui carnem induit

Virginei pudoris,
In cujus carne ferbuit

Stupendi vis amoris,
Mens jubilet interius,
Vox concinat exterius

In organis sonoris.

In 1. Nocturno.
Antiphonae.

1. Virgo prudens emiserat

Votum integritatis
Nec nubere decreverat,

Nisi per veritatis
Oraculum, spiraculum
Et stupendum spectaculum

Constaret sibi satis.

2. Virtus divina claruit

Cum virgae praesentantur,
Ex quibus nulla floruit

Nec frondes dilatantur,
Sed virga Joseph floruit,
Tantum et ipsa fronduit

Et fructus renovantur.

3. Visis his mirabilibus

Mox virgo desponsatur,
Sed a secretis sedibus
Talis lex allegatur,
Quod primum florem virginum
Primo splendori luminum
Deberi causabatur.

Responsoria.

1. Creatis pereuntibus

Totus mundus multatur,

Hinc in secretis sinibus
Secretum pertractatur,

Cum quo misit ad virginem

Rex coeli fortitudinem,
Ut mundus redimatur.
V. Almus apocrisarius

Ut virginem affatur,

Animus ejus anxius
Pavescens meditatur,
Quare sic salutatur.

2. Gabrielis oraculum

Ut virgo ponderavit,
Mox cordis habitaculum

Sponso summo aptavit,
Et totum virgo credidit,
Quod paranymphus edidit,
Nec quidquam dubitavit.

V. Virgo concepit regia

Ad hanc credulitatem,

Ut fecundata gratia
Aeternam veritatem
Ad mundi claritatem.
3. Concepit virgo filium
Absque ullo pudore,

Fabricatorem omnium
Absque ullo labore,

Qui fecit ipsam virginem

Post Christum Deum hominem
Prae omnibus priorem.
V. Huic nulla virgo similis,
Munda sic et fecunda,

Quaecunque vero alia
Sterilis et immunda,
Primae nulla secunda.

In 2. Nocturno.
Antiphonae.

1. Tota virgo deifica

In montana volavit,
Contemnens ista lubrica

Cognatam salutavit,
Ad cujus salutiferum
Verbum atque luciferum

Non-natus exsultavit.
2. Cognatam tribus mensibus

Virgo adsociavit
Et suis sanctis manibus

De terra elevavit
Prophetam admirabilem,
Prae cunctis honorabilem,

Quem Deus suscitavit.

3. Corde Deum glorificat

Virgo intemerata,
Lingua Deum magnificat

In plebe visitata,
Glorificat et praedicat,
Magnificat, specificat

In sese fecundata.

Responsoria.

1. Gestat claustrum virgineum
Potentem infirmatum,

Gestat vas illud aureum
Divitem pauperatum,

Mirabile, terribile,

Concipere, conspicere
Immensum mensuratum,
V. Gigantem breviatum,

Excelsum incurvatum,

Creatorem creatum,
Stabilem immutatum
Et Deum humanatum.

2. Joseph, sponsus nutricius
Thalami pudorati,

Quia non erat conscius
Verbi carne velati,

Cogitabat discedere

Et occulte deserere
Vas templi consecrati.
V. Ipsam cura magnifica
Joseph reverebatur,

Quidquid arte mechanica
Sudando lucrabatur,
Sponsae praesentabatur.

3. Dum iret Jerosolymam
Joseph ad profitendum,

Non invenit hospitium
Virgini ad manendum,

Sed vile diversorium

Et modicum praesepium
Ad jumenta tenendum.
V. Ibidem nocte media
Peperit salvatorem

Virgo pudica regia
Non sentiens laborem
Neque ullum dolorem.

In 3. Nocturno.

Antiphonae.

1. Sicut emittit radium
Sol absque laesione,
Sic virgo dedit filium

Siue corruptione,
Puerpera clausifera
Concipiens et pariens
Absque foedatione.

2. Non conquassatur vitrea
Per radium solarem,
Sic nec aula virginea

Per partum puellarem,
Immo fit tota purior,
Integrior et pulchrior,
Non habens sibi parem.

3. Sicut vellus non rumpitur
Distillando liquorem,

Ita nec virgo laeditur
Gignendo creatorem,

Immo ut lana candida

Tota remansit lucida
Solis habens splendorem.

Responsoria.

1. In partu almae virginis
Tres soles claruerunt,

In unum corpus luminis
Paulatim redierunt,

Fons olei tunc patuit,

Et templum pacit corruit,
Et idola ruerunt.
V. Tunc circa solem aureus
Circulus se evexit,

Atque vultus virgineus
Cum prole, quam adspexit,
Augustus et dilexit.

2. Per spiritus angelicos
Pastores convenerunt,

Et per adspectus coelicos
Magi adoraverunt,

Utrique partum cernere

Superno Dei munere
Virginis meruerunt.
V. Legi naturae obvii

Ut Sodoma ruerunt,

Bos et brunellus socii
Reverentes fuerunt
Nec foetum tetigerunt.

3. In partu almae virginis
Cuncta obstupuerunt,
Nam sub adspectu luminis
Nullum talem viderunt,

V. Hunc nescivit scientia
Neque experientia,
Naturae refugerunt.

In Laudibus.

Antiphonae.

1. Laudent matrem pietatis,
Laudent templum trinitatis,
Laudent stellam claritatis,
Laudent hortum voluptatis
Regna et imperia.

2. Laudet fontem venustatis,
Laudet rosam caritatis,
Violam humilitatis,
Lilium integritatis
Jubilans ecclesia.

3. Laudet rubum visionis
Et virgam correctionis,
Laudet vellum Gedeonis
Et manna refectionis
Tota vigilantia.

4. Altum thronum Salomonis,
Pulchrum, qui est Absalonis,
Totum portum stationis,
Claram vallem visionis
Benedicant omnia.

5. Laudent matrem veri Dei,
Matrem summi Nazarei
Cuncta, quae subsistunt ei,
Coelum, terra, lux dici
Et superna curia.

Ad Benedictus.

A. Partum virginis Mariae,
Arcam totius sophiac,
Quem collaudant omni die
Angelicae hierarchiae,
Benedictum comprobemus,
Benedictum invocemus,
Quem Deum esse censemus.