11. De sancta Anna.

In 1. Vesperis.

Antiphonae.

1. Anna, beata domina,

Mater genitricis Dei,

Colatur inter agmina

Deo dicata fidei.

2. Colatur Anna genitrix

Propter natam mirificam,

Sed plus virgo redemptrix

Propter prolem deificam.

3. Nam de praeclaro genere

Fuit mater cum filia,

Dotatae miro munere,

Florem dantes ut lilia.

4. Veneremur omnes matrem

Genitricis deificae,

Ut ejus apud patrem

Gratulemur magnifice.

5. Ordo, qui natam colit,

Colit genitricem,

Quia cum Anna recolit

Mariam victricem.

Ad Magnificat.

A. Coeleste patrocinium

Refloruit in Anna,

Dum insigne triclinium

Gratuitum ut manna

Protulit decimum

Ferens antiqua damna,

Claruit lucinium

Perfusum luce magna.

Invitatorium.

Coelestium agminum

Deum adoremus,

Et pro Annae jubilo

Omnes jubilemus.

In 1. Nocturno.

Antiphonae.

1. Annae vita sic claruit

Apud vicinas gentes.

Quod semper Deo placuit

Recreando egentes.

2. Suam namque substantiam

Dividebat trifarie,

Partem impendens tertiam

Mox templo vel ecclesiae,

3. Egenis et peregrinis

Erogabat aliam,

Clientulis ac parvulis

Ac sibi residuam.

Responsoria.

1. Nazarenus ejus pater,

Vitae vir egregiae,

De Bethlehem ejus mater

Regali progenie,

Sic praeclarus ejus venter

Insigni fulsit germine.

V. Dignum erat prolem talem

Hoc oriri ordine,

Quae haberet vim regalem

Praecelsam miro culmine.

2. Haec est coelum, in qua stella

Ortum duxit, quam plagella

Rescribit Mosaica,

Quae servata a procella

Mentes servat et in cella

Reponit probatica.

V. Ora, mater, filiam

Summe benedictam,

Ut ducat ad patriam

Plebem hic afflictam.

3. Gloriosa de te dicta,

Radix Jesse benedicta,

Radix illustrissima,

Qua praeclara insignita

Finem habent maledicta

Pro culpa gravissima.

V. Ex te consurgens virgula

Dei per virtutem,

Per quam reflorent singula

Et habent salutem.

In 2. No cturno.

Antiphonae.

1. Haec Joachim viro juncta

Sed sterilis conjugio,

Foetum optans semper cuncta,

Quia data opprobrio.

2. Sed quos foetu desperatos

Lex fortunae prodidit,

Partu sacro fecundatos

Rex naturae reddidit.

3. Sic a Deo fecundatur

Consecratus uterus,

Novo foetu consecratur

Miro partu genitus.

Responsoria.

1. Gaude felix

radix Davidica,

In qua virga

crevit mirifica,

Quae fructum tulit

virtute coelica;

V. Invocemus

dominam gratiae,

Quam fons perennis

implet clementiae.

2. Funde vinum desolatis

Phiala laetitiae,

De qua novae desperatis

Munus fluxit gratiae,

Ut de regno claritatis

Detur spes fiduciae.

V. O felix vitis,

de cujus surculo,

Tantum germen

redundat saeculo,

Cunctos reficiens

vitali poculo.

3. O quam magna et praeclara

Arca lignis et insignis

Coaptata coelitus,

Urnam veram quae gestavit,

In qua panis se locavit

Collatus divinitus.

V. O cella aptissima,

Paradisi porta,

Fructu suavissima,

Semper nos conforta.

In 2. Nocturno.

Antiphonae.

1. Trino fetu fecundata

Gaudet Anna sterilis,

Dei domo consignata

Manet admirabilis.

2. Ipsa namque tres Marias

Inventa est gignere,

Sed prima, ex qua Messias,

Digna est excellere.

3. O quam Anna veneratur

Et debite colitur

Et in coelis sublimatur

Et terris attollitur.

Responsoria.

1. Quis condigne turturis

Matrem collaudavit,

Cujus vox in superis

Audita vocavit

In consortem miseris

Deum, qui sanavit

Vulnus culpae veteris

Et vitam donavit.

V. Benedictus fructus

Annae benedictae,

Cujus clarus ortus

Fulsit mundo vitae.

2. Felix mater, quae figuris

Tot et tantis in scripturis

Praesignata legitur,

Unde cunctis morituris,

Pressis poenis vivituris

Lux praefulgens oritur.

V. Sedentes in tenebris

Vallis hujus miseriae

Ac detentos latebris

Fac lucere prospere.

3. In aeterno speculo

Praevisa sed saeculo

Data senescenti,

Mater Anna, sedulo

Subvenire populo

Prompta sis egenti.

V. Tu matronarum gloria,

In gloria locata,

Degentes in miseria

Sustolle mater grata.

In Laudibus.

Antiphonae.

1. Terra, pontus, astra, mundus

Laetum dent obsequium,

Chorus psallat laetabundus

In Annae praeconium.

2. Annam vocatam gratiam

Gratanter invocemus

Et datam sibi gloriam

Post gratiam speremus.

3. Nam meritis et precibus

Dat Annae jam dilectae

Rex Christus, natae filius,

Quidquid optatur recte.

4. Quis ergo nunc de venia

Fiducia carebit,

Cum tam mater quam filia

Rem nominis implevit.

5. Accedat reus propere

Non deserens olivam,

Quae novum fructum gratiae

Produxit in spem vivam.

Ad Benedictus.

A. Benedictus sit Dominus,

Quae tot per os sanctorum

Dudum promisit coelitus

In via meritorum,

Nunc jam persolvit penitus

In salutem cunctorum.

In 2. Vesperis.

Ad Magnificat.

A. O lumen totius mundi,

Gemma pretiosa,

Mater regis tremebundi

Mire virtuosa,

Tu populi sitibundi

Unda dulcorosa,

Fac ut demum laetabundi,

Virgo gratiosa,

Simul fruamur cum Anna

Vita gloriosa.