12. De sancto Achatio.

1 a. Martyres stabant
in agone
Spe mercedis et coronae,
Virili audacia,

1b. Nec mutabantur
nec fugerunt,
Mundi cuncta proiecerunt
Blandimenta spuria.

2 a. Procerum milia dena

Spreta gaudent mortis poena
In Dei militia,

2 b. Vanos deponunt errores
Ad vitae currentes fores
Felici industria.

3 a. Universa ergo viva
Voce clamant rediviva,
Depromunt mirantia

3 b. Proceres hi tam praeclari,
Iubari pares solari
Fidei constantia.

4 a. Euphratenses, Cadarenos,
Errore gentili plenos
Colentes daemonia,

4 b. Valenter quidem vicerunt,
Triumphantes exstiterunt
Dei passim gratia.

5 a. Triumphantes iucundantur,
Iucundantes admirantur
Dei mirabilia.

5 b. Arraratconscendunt montem
Vitae sitientes fontem,
Laudis dantes munia.

6 a. Regum iussu lapidantur,
Flagris diris flagellantur,
Foedantur sermonibus.

6 b. Clavi tergo vi parantur,
Martyrum ut infigantur
Sanctis horum pedibus.

7 a. Margaritae porcis dantur,
Canibus sancta iactantur
Dictata sententia.

7 b. Crucibus sic affiguntur,
Animae caelo redduntur
Sollemni cum gloria.

8 a. His ergo festis laetemur
Martyrum et hunc precemur
Felicem denarium,

8 b. Nobis ut Deus deorum
Meritis praestet ipsorum
Sacrum septenarium.