14. De sancta Barbara.

In 1. Vesperis.

Super Psalmos.

A. Barbara cum prudentibus

Luminosis lampadibus

Sponso vult obviare,

Ut cum ipso ad nuptias

Et aeternas delicias

Felix possit intrare.

R. Ut pater diligentius

Possit hanc custodire,

Aulam construxit aptius

Formositatis mirae

Et duas jussit strictius

Fenestras aperire.

V. Virgo prospectans altius

Trinam fenestram pulchrius

Sciebat convenire.

Ad Magnificat.

A. O stirps Nicomediae,

Castitatis lilium,

O nitor munditiae

Et exemplum inclitum

Plebis Christianae,

Fer, Barbara, gratiae

Christi patrocinium,

Ne prolapsis veniae

Tempus breve creditum

Defluat inane.

Ad Completorium.

Super Psalmos.

A. Mortales horret nuptias,

Quas conferebat, pater,

Ejus optans delicias,

Quem parit virgo mater

Ad Nunc dimittis.

A. Virgo formosa facie,

Sed fide plus formosa,

Formositatem gratiae

Custodit studiosa.

Ad Matutinum.

Invitatorium.

Os, lingua, mens in Barbara

Christo confiteantur,

Quam caro, mundus, tartara

Victricem admirantur.

In 1. Nocturno.

Antiphonae.

1. Barbara de gentilibus

Nascens ut flos de spina,

Pudoris fragrat floribus

Carnis spreta sentina.

2. Haec sponso plena lampade

Occurrit sapienter,

Trinum Deum in monade

Adorans reverenter.

3. Alta fulgens origine

Conatur superare

Ac morum celsitudine

Christum studet amare.

Responsoria.

1. Lucem caeca gentilitas,

Quam produxit, ignorat,

Quam excaecavit vanitas

Petrarum, quas adorat;

Rectas Barbara semitas

Tenens Christum adorat.

V. In hac tenera caritas,

In hac vera humilitas

Deum amat et orat.

2. Hanc pater amans tenere

Omnem, qui hanc petebat

Sponsam sibi conjungere,

Repellens emittebat,

Qui sine ipsa vivere

Vix se posse credebat.

V. Volens haec Christo nubere,

Ut stercus scit contemnere,

Quae mundus promittebat.

3. Fidem gerens In pectore

Trinitatis vivificae

Amatrix summi regis,

Aulam factam in tempore

Interpretatur mystice

Vinciens novae legis.

V. Christum vult mente, corpore,

Hujus pastoris unice

Vult esse consors gregis.

In 2. Nocturno.

Antiphonae.

1. Cernit patris palatium,

Quod jussit fabricare,

Deo cordis hospitium

Exoptans praeparare.

2. Ternam fenestram sociat

Duabus fabricatis,

Quo firmatam se nuntiat

In fide trinitatis.

3. Aquas quaerenti gratiae

In sicco balneorum

Dat de sicca duritie

Aquas Deus deorum.

Responsoria.

1. Virgo sacra desiderat

Quaedam subintrans balnea

Lotionem salutis,

In quibus aqua deerat,

De siccitate saxea

Fontem dat rex virtutis ;

V. Lavat, quam intus laverat,

Dans munus super aethera

Stolam, quam dat ablutis.

2. Quam sanctus docet spiritus,

In trinitatis nomine

In aquis se submergens

Haec emundatur penitus,

In hoc baptismi flumine

Sordes omnes detergens;

V. Exsurgit inde coelitus

Lustrata Dei lumine

Ad altiora pergens.

3. Dum pater hanc persequitur,

Latens dat locum irae

Et sub rupe absconditur

Cernens hunc insanire,

Sed a pastore proditur

Rustico mentis dirae.

V. Pastor, grex maledicitur,

In duram petram vertitur

Nutu virtutis mirae.

In 3. Nocturno.

Antiphonae.

1. Pastor fugam virgineam

Monstrans ob mentem duram

Maledictus marmoream

Versus est in naturam.

2. In his, baptismo flaminis

Quae prius erat lota,

Baptismum sumpsit fluminis,

Ut esset munda tota.

3. Ut hanc in Christum credere

Furens pater audivit,

Ad exstinguendum vulnere

Vadentem impetivit.

Responsoria.

1. Cum sit prorsus superata

Rabies barbarica,

Jam sententia dictata

Praeses voce publica:

Mox sit, inquit, decollata

Barbara malefica.

V. Pater caecus mente vectus

Rabie mirifica

Ensem capit, caput rapit

Manu diabolica.

2. Adsunt carcer et tormenta,

Ferrugines, verbera,

Ad poenarum argumenta

Abscinduntur ubera,

Sed plena medicamenta

Dedit Christi dextera.

V. Barbara Christo intenta

Quaeque perfert aspera,

Post mundi cruciamenta

Coeli exspectans munexu.

3. Pro puella virginea

Christus consurgit mutuo,

Nam procella fulminea

Et stupendo tonitruo

Percussus pater flammea

Plaga perit continuo.

V. Mox redactum ad cineres

Dioscorum stupesceres,

Sic turbo spargit pulveres,

Quod nec signum adspiceres.

In Laudibus.

Antiphonae.

1. Barbaram patris furia

In praefecti praesentia

Incusat Christianam,

Allegans ante judicem

Rationem multiplicem

Sectam firmando vanam.

2. Praefectus voce subdola

Yult, quod adoret idola

Et donis venereturz ;;

Ipsum virgo Christicola

Cum secta sua frivola

Et diis caecum fatetur.

3. Cur, inquit, deos colere

Jubes et in hos credere

Caecos, surdos et mutos,

Qui nec sibi consulere

Valent neque defendere

Nec se reddere tutos.

4. Exclamans voce libera:

Solus, qui fecit sidera,

Dignus est adorari,

Quem terra, pontus, aethera

Et infernus et cetera

Cognovi venerari.

5. Aspernans mundi prospera,

Carcerem, minas, verbera,

Ferrum perfert et ignes ;;

Spirans ad coeli munera

His conjuncta, quas dextera

Christi fecit insignes.

Ad Benedictus.

A. Consors Christi militiae

Hostiles vires conterit,

Fidei scutum capiens,

Tela exstinguens ignea ;

Post coronam victoriae

Felix athleta reperit,

Ad sponsum Christumve-

niens,

Regna sumens aetherea.

In 2. Vesperis.

Ad Magnificat.

A. Velox transit stadium

Vana cuncta fugiens

Virgo cordis puri,

Comprehendit bravium,

Honorem suscipiens

Regni TJermansuri.