20. De sancto Aegidio.

1 a. Salve, dies, quam sacravit
Morte sua et dotavit
Beatus Aegidius.

1 b. Chori voce vocum melos
In hac die tangat caelos
Solito devotius.

2 a. Huic caelum gratulatur,

In hoc festo iucundetur

Mundus voce melica.

2 b. Per caelestis plagae clima
Condescendat huc ad ima
Virtus patris caelica.

3 a. Morsus anguis hic curavit,
Solo verbo qui sanavit
Arreptum daemonio.

3 b. Rectores concussae ratis,
Liberavit exsul gratis
A maris naufragio

4 a. Extra mundi suetum morem
Iste fecit successorem
Christum patrimonii.

4 b. Hic telluris reddens fructum
Terrae sepelivit luctum
Gratus in viciniis.

5 a. Ex quo vestis est induta,
Aegri salus est secuta
Meritis Aegidii.

5 b. Hunc Nemacensis principis
Celebrem fecit populis
Suscitatis filii.

6 a. Aqua mota in divina
Prece sua cupressina
Mare tulit ostia.

6 b. Febris curator anhelae,
Quem pavit silvestris ferae
Lactis alimouia.

7 a. Carolo quoddam peccatum
Nulli unquam revelatum
Dimitti obtinuit,

7 b. Si ab eo abstineret ;

Propter quod, ne repeteret,
Salubriter hunc monuit.

8 a. Est etiam nobis datum
Huius prece donum gratum,
Quod, si quis deliquerit,

8 b. Sit commissum condonatum
Paenitenti, si peccatum
Ultra non commiserit.

9 a. Multa quidem et alia
Fecit iste prodigia,

Quae nota sunt petentibus.

9 b. Quod rogamus, ut praemia
Nobis dari perennia
Impetret in caelestibus.