QUAESTIO XIII An locus sit generationis principium

Averroes super cap. de Genere. Okam ibidem. Conimbri. ibidem. Joan. Ang. Bras. et Rodriguez super hanc quaest.

Quod non videtur. Quia pater est principium per se : locus vero per accidens ; quia non movet.

Item, si sic : igitur et tempus erit generationis principium, quia est mensura extrinseca, sicut locus.

Ad oppositum est Porphyrius.

Ad quaestionem dicendum, quod propositio est vera, si attendatur similitudo quoad genus causae, quia utrumque est in genere causae efficientis, sic intelligit Porphyrius, ideo dicit principium quod a proprietate convenit efficienti. Falsa est autem similitudo, si intelligatur quoad omnem modum causae, nam pater est per se efficiens, locus vero tantum per accidens, scilicet coadjuvans ad generationem, et conservans. Differentia membrorum istius distinctionis patet 2. Physic. cont. 33. et 5. Metaph. cont. 3.

Ad argumenta. Ad primum patet. Ad secundum dico, quod tempus non per se coadjuvat ad generationem, nec salvat generatum, sed magis est causa corruptionis per se, ut ostenditur 4. Physic. cont.117.