Coll. XXIII. Quomodo procedendum sit ad infideles.

Filioli mei, Deus mihi mandavit, quod mittam vos ad terram Saracenorum ad praedicandum et confitendum ejus fidem et legem Mahometicam impugnandam. Et ego etiam ibo per aliam partem ad infideles et fratres alios mittam per universum mundum. Idcirco, filii, paretis vos ad implendum Domini voluntatem. Et, charissimi filii, ut melius Dei praeceptum possitis adimplere pro salute animarum vestrarum, videatis, quod inter vos sit pax et concordia et nodus indissolubilis charitatis. Fugite invidiam, quae principium fuit nostrae perditionis. Sitis in tribulationibus patientes et in prosperis humiles et sic eritis in omni pugna victores. Imitatores Christi estote in paupertate, obedientia et castitate. Dominus enim Jesus Christus pauper natus est, pauper vixit, paupertatem docuit et cum paupertate decessit. Et ut ostenderet se diligere castitatem, de virgine nasci voluit. Virgines milites innocentes praemisit, virginitatem consuluit et servavit, inter virgines ex hac vita migravit. Obedientiam etiam a suo ortu tenuit usque ad mortem crucis. Spes vestra tantum sit in Deo, qui vos diriget et juvabit. Portetis vobiscum regulam et breviarium, ut divinum officium perfectissime recitetis, et sitis majori vestro fratri Vitali omnes obedientes. Filii mei, quamvis de vestra bona voluntate gaudeam, cor meum tamen pro vestro recessu et separatione a me sentit quandam amaritudinem amorosam, sed oportet, quod Dei praeceptum praeferamus propriae voluntati. Rogo vos, quod ante oculos vestros semper habeatis Dominicam passionem, quae vos roborabit et ad patiendum pro ipso fortius animabit.