26. De sancta Eufeniia.

In 1. Vesperis.

Super Psalmos.

A. Virginis Eufemiae

Festum celebremus,
Ut in regno gloriae
Cum ipsa regnemus.

Ad Magnificat

A. Transit ad regni solium
Virgo martyr Eufemia,
Virginitatis lilium
Fragrat in coeli curia,
Rosa coeli rosarium
Mira decorat gloria.

Ad Matutinum.
Invitatorium.

Eja nunc solemnia
Laeta celebremus,

Virginis pro gloria
Christo jubilemus.

In 1. Nocturno.

Autiphonae.

1. Orta de nobilibus

Stirpis flos Eufemia,
Nobilior moribus
Fit parentum gloria.

2. Christo consecratur
Aetate novella,
Nova pugil datur
Ad fidei bella.

3. Per manus crudelium
Virgo flagellatur,
Castitatis lilium
Inter spinas datur.

Responsoria.
1. Nobilis Eufemia,
Senatoris filia,
Statim ab infantia
Fide consignatur,
Christo sponso datur,
V. Candens inter lilia
Digna coeli curia.
2. Igitur martyribus
Pro fide certantibus

Conscia coronae
Virgo martyr inclita
Pugil adstat solita
Pro te, Jesu bone.
V. Ante Priscum posita
Nullo metu territa
Exstat in agone.
3. Stat Apelianus,
Sophista profanus,

Ut subvertat virginem,
Vel ut mittat manus
Ad fundendum sanguinem,
V. Judex ritu vanus
Nititur insanus.

In 2. Nocturno.

Antiphonae.

1. Judex frustra nititur

Virginem seducere,

Sed nec blandis vincitur

Nec terretur verbere.

2. Fidelis christicola

Vere Christum amans
Detestatur idola
Jesum solum clamans.

3. Judex per sartaginem
Jubet illam frigi,
Sed non Christus virginem
Permittit affligi.

Responsoria.

1. Vana Prisci sunt figmenta,
Quibus parat instrumenta,
Ut rotarum per tormenta
Carnem terat virginis ;
V. Judex comminatur,
Sed frustra conatur,
Quod saxorum machinis
Carnem terat virginis,

2. Ardens fornax praeparatur,
Ubi virgo comburatur,
Sed illaesa conservatur
Nihil in se sentiens;
V. Angelorum chorus
Apparet decoras
Virginem custodiens.

3. Virgo martyr dum torquetur,
Jesum laudans confitetur

Pro quo cuncta tolerat,
Signo crucis se tuetur
Et tormenta superat;
V. Cum haec Christum invocat,
Non hanc aqua suffocat,
Et leo non lacerat.

In 3. Nocturno.

Antiphonae.

1. Virgo liberatur

A tormentis omnibus,
Sed tandem mactatur
Diris serrae dentibus.

2. Christus vocat virginem
Vincentem feliciter
Ad beatitudinem
Habendam perenniter.

3. Virgo, tua merita

Nos solvant peccatis,
Et prece solicita
Nos junge beatis.

Responsoria.

1. Prisci spernunt jussionem
Duo de tortoribus,
Ad sanctae intentionem
Angelorum visionem
Videntes in ignibus,
V. Convertuntur et junguntur
Beatis martyribus.

2. Gladiorum cuspides
Et acutos lapides

Virgo Christi nomine
Pertransit nec laeditur,
Sed nec caro frangitur
Ejus in sartagine ;
V. Serrae subjicitur,
Nec tamen scinditur
Ejus acumine.

3. O martyr Eufemia,
Jam glorificata,
Felici victoria

Virgo coronata,
Duc nos ad coelestia
V. Gaude jam beata
Sponso copulata.

In Laudibus.

Antiphonae.

1. Laudes det ecclesia
Christo, regi gloriae,
Peragens solemnia
Martyris Eufemiae.

2. Virgo spirat ad trophaeum,
Dum tormenta tolerat,
Martem vanum spernit deum
Et ad Christum properat.

3. Ignis per incendium

Sanctum vas probatur,
Sanguinem per proprium
Tota ean ditatur.

4. Angelorum sociam,
Virginem laudemus,
Ut per ipsam gratiam
Christi reportemus.

5. Virgo, fortis agonista,
O felix Eufemia,
Fac, ut tecum regnet ista
Devota familia.

Ad Benedictus.

A. Martyr Eufemia,
Candoris lilium,
Clara victoria
Tendens ad bravium,

Transit ad gaudia
Post cursus stadium,

Serva propitia
Chorum laudantium.

In 2. Vesperis.

Ad Magnificat.

A. Virgo martyr Eufemia,

Decus et honor virginum,

Pro devota familia
Supplex exora Dominum,

Ut sit tecum in gloria
Post hujus vitae terminum.