36. De sancta Anna.

1 a. Gratiarum actio
Sit Mariae filio,
Salvatori omnium ;

1 b. Annae coronatio
Nostra exsultatio,

Nostrum est convivium.

2 a. Praesentatur hodie
Anna regi gloriae

Cum hymnis et laudibus ;

2 b. Amplexatur filia
Matrem cum laetitia
Cum suis virginibus.

3 a. Datur in caelestibus
A sanctorum civibus
Annae salutatio ;

3 b. Laudant matris viscera,
Laudant matris ubera
Tota caeli contio.

4 a. Roga, mater, filiam,
Paradisi curiam

Move tuis precibus ;

4 b. Detur per te venia,
Fluat nobis gratia
De Christi visceribus.

5 a. Fructus ventris virginis,
Unda tui sanguinis
Culpas nostras dilue ;

5 b. Audi matrem filia,
Inter rosas, lilia
Nobis locum tribue.