Congregatio de Causis Sanctorum 559

ACTA CONGREGATIONUM

CONGREGATIO DE CAUSIS SANCTORUM

FOROLIVIEN. - BRITTINORIEN.

Beatificationis et Canonizationis Servae Dei Mariae Clarae Seraphinae a Iesu

Farolfi (in saeculo: Franciscae), fundatricis Sororum Clarissarum Franciscalium

Missionarium a Sanctissimo Sacramento (1853-1917)

DECRETUM SUPER VIRTUTIBUS

« Ite et amorem Iesu eucharistici succendite et omnibus afferte. Vosmetipsas

sanctificate, dein alios. Et semper magna caritate utimini ».

Testamentum spiritale Servae Dei Mariae Clarae Seraphinae a Iesu (in

saeculo: Franciscae Farolfi), his in ultimis verbis eius collectis, mira virtute

exprimit fervorem contemplationis et ardorem missionis, quos ipsa tamquam

pretiosam hereditatem novae familiae religiosae e corde eius suscitatae et in

uberi Sancti Francisci arbore innisae relinquere voluit.

Serva Dei, tertia ex novem filiis, in vico Tussiniano apud Forum Cornelii,

prope Bononiam, die 7 mensis Octobris anno 1853 nata est. Ad fontem

baptismalem insequenti die regenerata, nomina sumpsit Franciscae Angelae

Iustinae Birgittae. Die 18 mensis Aprilis anno 1861 Confirmationis et biennio

post Primae Communionis aucta est sacramentis.

In familia profunda christiana pietate informata primariam recepit

institutionem, iam inde a pueritia toto corde mandatis adhaerens fidei ac

praesertim fervidam vitam eucharisticam colens cotidiana sacrificii Missae

participatione innisam. Tantus eius fervor adeo in dies excrevit, ut verus

spiritus missionis, quo postea fundationis tempore ipsa enituit, in ea adhuc

puella, quae modo decimum agebat aetatis annum, pateret, cum sibi pro-

positum erat, infantili iucunditate impellente, ad missiones effugendi, sicut