Acta Apostolicae Sedis - Commentarium Officiale584

TAURINEN.

Beatificationis et Canonizationis Servi Dei Iosephi Quadrio, sacerdotis professi e

Societate Sancti Francisci Salesii (1921-1963)

DECRETUM SUPER VIRTUTIBUS

«Dominum Christum sanctificate in cordibus vestris, parati semper ad satis-

factionem omni poscenti vos rationem de ea, quae in vobis est, spe » (1 Pt 3, 15).

Haec beati Petri Apostoli adhortatio idoneum ad intellegendam vitam et

opus spirituale Servi Dei Iosephi Quadrio esse potest exordium, qui totam

vitam impendit, praesertim vero in munere magistri, quo enituit, mysterii

Dei pulchritudine demersus, ad veritatem divinam, quam ut intimius

amplectaretur et aliis diligenter tradere posset perquisivit, cum fide et humi-

litate summopere accedens.

Venerabilis Servus Dei Iosephus Quadrio Vervii prope Sondrium in Italia

die 28 mensis Novembris anno 1921 e modesta agricolarum familia christiana

pietate penitus informata natus est, ex qua solidam humanam et religiosam

institutionem recepit. Infantiam in scholae assiduitate, in doctrinae christia-

nae studio, in liturgicarum celebrationum participatione et in rusticis operi-

bus degit. His in rerum adiunctis, humilitate atque ima evangelica pietate

suffultis, puer Iosephus expressam iam animadvertit peculiarem inclinatio-

nem ad religiosam vocationem. Prima Eucharistica Communio, quam nonum

aetatis annum agens percepit, et voluntarium votum perpetuae castitatis,

quod cum undecimum annum implevit privatim professus est, in honorem

Beatae Mariae Virginis emissum, huius praecipui atque impensi spiritualis

provectus denotaverunt initium.

Vix duodennis, Servus Dei, postquam Sancti Ioannis Bosco vitam et

opera legerat, domino Aloysio Sartorio parocho suscitante, apud Institutum

Missionale Salesianum Eporediense se recipi postulavit, ubi enim mense Sep-

tembri anno 1933 pervenit: quod paulatim fervens eius desiderium, iam inde

ab infantia tempore processum omnino omnesque per annos Domino inser-

viendi perfecit. Insequentibus annis, professionem religiosam temporariam

Iosephus emisit ac dein in studia philosophiae et theologiae sollicito animo

incubuit; perpetuis demum votis professis, die 16 mensis Martii anno 1947

prebsyteratu auctus est. Exitus studiorum dissertatio fuit ad Doctoratum

assequendum de Assumptione Beatae Mariae Virginis, quam apud Pontifi-

ciam Universitatem Gregorianam in Alma Urbe disceptavit.