Acta Apostolicae Sedis - Commentarium Officiale590

In lycaeo usque ad annum 1938 studiis superioribus, quibus ac praesertim

in studiis humanitatis eminuit, peractis, Cracoviam Servus Dei cum patre suo

migravit, ubi facultati Philosophiae Universitatis Studiorum Jagellonicae

nomen dedit et circulum scaenicum assidue frequentavit.

Altero mundano bello grassante, quo tempore Polonia a Germanis nazistis

est invasa, omnia athenaea scholaeque sunt praeclusa, itaque Servus Dei, ob

lugendam mortem patris solitudine affectus, ad labores coactus est, primum

ut operarius apud fodinas petrarias, dein apud officinam chimicam.

Hoc eodem angustiarum ambagisque tempore, Servus Dei vocationem ad

sacerdotium ardenter animadvertit. Proinde, anno 1942, studia Theologiae

apud Seminarium clandestinum Cracoviense iniit et ab anno 1944 una cum

aliis eiusdem Seminarii discipulis ab Excellentissimo Domino Stephano

Sapieha in Palatio Archiepiscopali ferventer exceptus est, quo maiore secu-

ritate, quiete et tranquillitate institutionem theologicam pergeret.

Die 1 mensis Novembris anno 1946, presbyteratus ordine auctus est ac

statim in Urbem ad perficienda Theologiae studia missus. Anno 1948, docto-

ratum in Sacra Theologia adeptus, in Poloniam rediit, ubi coadiutoris paroe-

cialis et cappellani Universitatis simul munera assumpsit. Anno 1953, studia

Philosophiae in Universitate Catholica Studiorum Lublinensi renovavit et

titulo doctoris atque munere libere docendi ornatus est. Extemplo ei officium

magistri Theologiae Moralis et Ethicae apud Seminarium Maius Cracoviense

commissum est, sicut et apud eandem Facultatem Theologiae Lublinensem.

Summus Pontifex Pius XII, veneratae memoriae, die 4 mensis Iulii anno

1958 Episcopum titularem Ombiensem et Auxiliarem Cracoviensem eum no-

minavit. Die 28 insequentis mensis Septembris, consecrationem recepit ab

ipso Archiepiscopo Cracoviae, Excellentissimo Domino Eugenio Baziak,

cuius pastorali officio die 13 mensis Ianuarii anno 1964 successit. Hoc tem-

pore, Servus Dei variis Sacrosancti Concilii Oecumenici Vaticani Secundi

actuose interfuit sessionibus, ubi gradatim mira eius et firma indoles emicuit,

praesertim cum operam navaret in Constitutionem Gaudium et Spes redigen-

dam.

Summus Pontifex Paulus VI eum Cardinalem Sanctae Romanae Ecclesiae

in Consistorio die 26 mensis Iunii anno 1967 creavit. Illis annis, Servi Dei

opera navitate humani cultus et pastoralis curae, necnon altercationibus

disputationibusque cum Polono regimine communistarum enituit: cum civilis

auctoritatis obsequio coniunxit fiduciam atque audaciam evangelici nuntii.

Firmiter conscius se esse pastorem et ducem animarum, ac fidem habere