38. De sancta Anna.

1. Salve, Anna veneranda,
Recte Anna nuncupanda,
Quae cunctis es gratiosa.

2 a. Ab aeterno praeelecta
Et a regum stirpe secta
Manu sapientiae;

2 b. Ex te nata stella maris,
Virgo mater, expers paris,
Regina clementiae.

3 a. O quam felix, quam beata,
Tali prole fecundata
Parens matris gratiae;

3 b. Huic accedunt binae natae-
Et sex proles perbeatae
Cum praesule Simeone.

4 a. En, in culmo plures spicae,
Atque vitis ex radice
Surgentes tres palmites.

4 b. Vere celsus tuus status
Et immensus potentatus
In caelesti curia.

5 a. Ergo, Anna, mater pia,
Tota stirpe cum Maria
Iesum ora filium,

5 b. Quo sic eum veneremur,
Ut in caelis collaetemur
Post praesens exsilium.