49. De sancta Leocadia.

In 1. Vesperis.

Ad Magnificat.

A. O virgo Leocadia,

Toleti laus et gloria,

Ad tui festi gaudia

Currit tua familia

Confidens, quod coelestia

Habebit per te praemia.

Ad Completorium.

Super Psalmos.

A. Invocantes nos exaudi,

Fac adstantes tuae laudi

Dignos gloriae corona.

Ad Nunc dimittis.

A. Per hujus sanctae merita

In tuo sancto nomine

Dimitte cuncta debita

Nunc servis tuis, Domine.

Ad Matutinum.

Invitatorium.

Laudemus Christum Dominum,

Qui sanctam Leocadiam

Inter choreas virginum

Tulit ad coeli gloriam.

In 1. Nocturno.

Antiphonae.

1. Sanctam Leocadiam

Coronasti, Domine,

Honorem et gloriam

Habet pro certamine.

2. In timore Domini

Permansit immota,

Ejus sancto nomini

Reddens sua vota.

3. Quaesivit haec faciem

Dei diligenter,

Figens mentis aciem

In eum potenter,

Cur coelestem requiem

Intravit gaudenter.

Responsoria.

1. Dirus praeses Dacianus

Ad Toletum veniens

Ibique reperiens

Sanctam Leocadiam,

Quam ut furens et insanus

Ad suam praesentiam

Adduci praecepit,

V. Eamque adspiciens

Et verbis alliciens

Suadere coepit:

2. Cum nobilis Toletana

Sis, ut bene sentio,

Cur te levis atque vana

Fallit circumventio,

Ut a deorum insana

Fugias servitio ;

V. Cui Christo servituram

Et tamquam suam facturam

Te proferas, nescio.

3. Ad haec virgo sancta dixit:

Me tua suasio,

Verborum illusio,

Generis blanditio

Et vana promissio

A Christi servitio

Non possunt retrahere ;

V. Christum enim bene novi,

Cui me totam devovi,

A quo tua verba vere

Non possunt retrahere.

In 2. Nocturno.

Antiphonae.

1. Verbum bonum eructavit

Sancta Dei famula,

Opera sua narravit

Christo regi sedula.

2. Dum aeternum praemium

Haec in mente gerit,

Domini refugium

Virtutemque quaerit.

3. Magnus et laudabilis

Deus noster nimis,

Sic est favorabilis

Ultimis ut primis.

Responsoria.

1. Tunc iratus praeses dirus

Inflammati cordis virus

Effudit crudeliter

Et mandavit, ut in imas

Carceris profundi nimis

Truderetur fortiter,

V. Cogitans, quibus tormentis

Eam in conspectu gentis

Affligeret acriter.

2. Ad Elboram properavit

Et Vincentium mandavit

Capi ac ipsum portavit

Ligatum ad Abulam,

Ubi Christi regulam

Suae sorores servabant,

Quia Christum adorabant;

V. Has enim duas sorores

Propter suos sanctos mores

Praeses dat supplicio

Cum fratre Vincentio.

3. Veniens Emeritam

Plures trucidavit,

Inter quos Eulaliam

Deo consecravit,

Quae fama Toletum

Postquam pervolavit,

V. Sancta Leocadia

Dominum oravit

Atque suum spiritum

Deo commendavit.

In 8. Nocturno.

Antiphonae.

1. Terram tuam, Domine,

Tu benedixisti

Et in tuo nomine

Captos redemisti.

2. Bonum fecit fundamentum

In coelesti patria,

Super aurum et argentum

Ponens aedificia.

3. Novum cantavit canticum

Deo, qui fecit omnia,

Cor gerens aromaticum

Beata Leocadia.

Responsoria.

1. Post multum vero temporis

Ildefonsus sanctissimus

Pervenit devotissimus

Ad festum sanctae virginis

Et orans ante tumulum,

Quo fuerat corpusculum,

V. Vidit tunc elevatum

Monumenti operculum.

2. In reserato tumulo

Virgo manum erexit

Et sancto Dei famulo

Velum suum porrexit,

Qui cum regis ganipulo

Partem veli praescidit

Congaudens de miraculo,

Quod stupefactus vidit ;

V. Et vocem hanc audivit:

Per vitam Illefonsi

Domina mea vivit.

3. Nostra civis Toletana,

Quae contempsisti mundana,

Procul pelle cuncta vana

Nunc a nostris cordibus

Et ad Deum funde preces,

Ne per hujus mundi facces

Involvamur sordibus.

V. Sancta martyr, sine caede

Digna coelesti mercede,

Tu pro nobis intercede.

In Lau dibus.

Antiphonae.

1. Regnat nunc in gloria

Induta decore

Sancta Leocadia

In sedis honore.

2. Ab annis infantiae

Domino servivit,

In aeterna requie

Ideo nunc vivit.

3. Ad te de luce vigilans,

Deus, haec beata

Sitiens et aestuans

Ivit mente grata.

4. Ista totis viribus

Quaerens sponsum virginum

In suis operibus

Benedixit Dominum.

5. In tanto solemnio

Quilibet fidelis

Laudet cum tripudio

Dominum de caelis.

Ad Benedictus.

A. Sit benedictus Dominus,

Qui sanctam Leocadiam

De Daciani manibus

Protexit dans victoriam

Et cum sanctis virginibus,

Duxit ad coeli gloriam.

In 2. Vesperis.

Ad Magnificat.

A. Alma virgo et decora,

Pro nobis Deum implora

Et nos tuos nunc honora,

Impetrans, ut sine mora

Nos Deus in mortis hora

Solvat et ad altiora

Regna sua pertrahat.