52. De sancta Apollonia.

1. Splendor patris et figura,
Nova per te fit factura,
Dum culpa vetus protoplasti
Mari rubro labitur,

2 a. Gustu serpens quam incussit

Intra paradisi saepes,

Tu crucis potu stipite

Solvis amarissimo.

2 b. Mortis natos a letali

Lapsu vehis ad primaeva,
Polorum sator, foedera
Tristia per pocula.

3 a. Quos dum reddis aetheris
Varia per praeludia
Caritatis fervidae,
Hos tandem multifaria
Beorum firmant dogmata;

3 b. Ut hac sacra virgine,
Quam miro comis opere,
Cunctis donas cernere,
Quae carnis iura domitans
Virtutum quaerit studia.

4 a. Primaevo nam aetatis flore
Pneumatis dulci freta more
Idolorum victimis
Renuit aptari ;

4 b. Paterno licet caesa furore,
Dei flagrat in dulcore,
Paupertatis collegiis
Petiit beari.

5 a. Quae, dum regis filia
Esset praeamanda,
Quaeque mundi vilia
Docet refutanda.

5 b. Gaudet veste regia
Intus decorari
Nilque foris aestimans
Dignum venerari.

6 a. Dat miseris munuscula,
Turbidis solacia
Nec daemonis fallacia
Concutitur iuvencula;

6 b. Fert languidis remedia,
Flentium convivia
In rara transfert gaudia,
Resuscitat infantulum.

7 a. O felix Apollonia,
Quanta te suspiria
Pulsant, quae innumera
Sustulisti verbera)

7 b. Tu caeli freta iubilo,
Prona sis auxilio
Tuis, virgo, famulis,
Qui te colunt precibus.

8 a. Gratiarum stipendia
Porrige certantibus
In valle lacrimosa,
Ut luce beatitudinis
Fruamur copiosa.

8 b. Supernorum tripudia
Adhibe gementibus
Tua per secreta,
Quos carnis aestuat stimulus,
Colona Olymporum,

9 a. A dolore dentium,
A languore mentium
Te serva venerantes,
Ne laudum vota irrita
Fiant per contraria,

9 b. Ut calore spiritus

Inflammatus promptior
Sit noster hic conatus
Neumarum novas ad odas
Peragendas in patria.

10 a. Ad amoena paradisi
Nos transferre satage,
Quo Seraphim et Cherubim
Sanctus, Sanctus proclamant.

10 b. Quae iubili melliflua
Modularis carmina,
O felix Apollonia,
Venire huc propera,

11. Perpende angarias.