53. De sancta Margarita.

In 1. Vesperis.

R. Virgo sancta Margarita,

Virtuosa cujus vita

Dat aegris auxilium,

Fide pollens et ignita

Sponso suo est unita

Christo per martyrium.

V. Margaritae victoria,

Omni digna memoria

Dat exemplum constantiae

Virginali militiae.

Ad Magnificat.

A. Margaritae solemnia

Mundum replent laetitia,

Omnipotentem Dominum

Laudat caterva virginum.

Ad Matutinum.

Invitatorium.

Salvatorem hominis,

hominem

adoremus Christum,

Qui Margaritam virginem

aeternam

introduxit ad gloriam.

In 1. Nocturno.

Antiphonae.

1. Margarita placens Deo

Non consensit constans reo

Praesidi Olybrio,

2. Vilipenso prorsns eo

Castitatis cum trophaeo

Repugnavit impio.

3. Nam minantem non expavit,

Ab iniquo sibi cavit

Declarans consilio.

Responsoria.

1. Gemma nitens Margarita,

Genae rosis insignita,

Est orta nobilibus,

Diligenter enutrita

Dedit aurem erudita

Doctrinis coelestibus.

V. Laudem spernens popularem,

Labentem lasciviam,

Est amplexa salutarem

Cbristi sapientiam.

2. In poenali statione

Stupefacta visione

Subita pertimuit,

Sed immunis a dracone

Virgo cum oratione

Laudes Deo tribuit.

V. Propter signum crucis verae

Draco nequit hanc habere.

3. Benedicta est puella,

Quae innocens et tenella

Carnis desideria,

Mundi regnum, hostis bella,

Vires vicit et flagella

Fideli fiducia ;

V. Coelibatu cum victrici

Fraudes fregit inimici.

In 2. Nocturno.

Antiphonae.

1. Virgo Deum imploravit,

Impetravit, quod optavit,

Virginis oratio.

2. Ad tyranni sedem ducta

Nullis ejus est seducta

Minis et blanditiis.

3. Prudens multum et instructa

Triumphatrix stat in lucta

Reluctans malitiis.

Responsoria.

1. Sponsa Christi speciosa,

Dum rogaret gratiosa,

Caesa poenis asperis,

Quae fuerat tenebrosa,

Facta fuit luminosa

Domus duri carceris ;

V. Audit vocem, vidit crucem

Et columbae speciem,

Calcat hostem pede trucem,

Vocatur ad requiem.

2. Erronei et profani

Audientes hanc pagani

Et ejus prudentiam

Plures facti Christiani

Reliquerunt ritus vani

Pravam observantiam ;

V. Mirabantur universi

Puellarem gratiam,

Qui ad Christum sunt convers

Per ejus facundiam.

3. Imperatrix honestatis,

Conservatrix puritatis

Et pudoris nivei

Gentilibus [excaecatis]

Viam prompsit veritatis

Et radios fidei ;

V. Laesionum haec perpessa

Pungitivos stimulos.

In 3. Nocturno.

Antiphonae.

1. Haec cultores idolorum,

Vanitatis et errorum

Audacter redarguit.

2. In pressuris tormentorum

Jesum esse dominorum

Dominum asseruit.

3. In conspectu populorum

Mortuorum et vivorum

Judicem recoluit.

Responsoria.

1. Martyr Dei gloriosa,

Caritate copiosa,

Diebus ac noctibus,

Lenitate radiosa,

Permanebat studiosa

In orationibus ;

V. Corde ferens et in ore

Sanctum evangelium

Suo fudit pro auctore

Cruorem innoxium.

2. Juxta tempus passionis

Suae deprecationis

Vocem Deus audiens,

Postulatis datis donis

Sempiternis eam bonis

Ditavit suscipiens;

V. Decollatae coeli coetus

Obviavit protinus,

Mansuetam mansuetus

Exaudivit Dominus.

3. Turba venit languidorum

Pretiosum et decorum

Corpus ejus tangere,

Cujus tactu vis morborum

Et acerba crux dolorum

Recedebat propere ;

V. Impetravit Margarita

Divinam clementiam,

Evidenter infinita

Facit mirabilia.

Prosa.

1. Salve, martyr Margarita,

Jesu Christi redimita

Pretioso sanguine,

Lege cujus erudita

Zelum patris es oblita

Divo dante flamine.

2. In adventu sponsi Christi,

Virgo vigil, ascendisti

Lampade cum oleo,

Pretiosam invenisti

Margaritam, quam emisti

In momento aureo.

3. Tu thesauro reportata

Gaudes agro commutato

Pro terrenis opibus,

Unde virgas iterato

Pertulisti, lacerato

Latere lampadibus.

4. Draco suos frangit rictus,

Per te cedit daemon victus

In obscuro carcere,

Ut praefectus maledictus

Ensis, rotae misit ictus

Te prostrando funere.

5. Sic pro Christo decollata

Ascendisti coronata

Ad coeli palatia,

Ergo per te nos, beata,

Duc per mortem ad optata

Paradisi gaudia.

In Laudibus.

Aatiphonae.

1. Solemnitas hodierna

Nos invitat ad aeterna

Justorum convivia.

2. Viae martyr est lucerna,

Monstrans iter ad superna

Vendicanda praemia.

3. Virgo mitis et serena,

Pietate omni plena,

Fer reis remedia.

4. Terminata brevi poena

Deitatis nunc amoena

Fruitur praesentia.

5. Non pervertant nos terrena,

Nec trahamur ad obscaena

Corporis contagia.

Ad Benedictus.

A. Veneremur salvatorem,

Qui poenarum per laborem

Et amaritudinem

Sanctis suis dat decorem

Et coronam et honorem,

Perennem dulcedinem.

In 2. Vesperis.

Ad Magnificat.

A. O beata Margarita,

Turris fortis et munita,

Vallis nber fructibus,

Sanctitate redimita,

Virgo simplex et perita,

Succurre cadentibus.