54. De ss. Arthemio, Candida, Paulina.

1. Adest hodie festum
nobis martyrum,

2 a. Quod quidem replet
caelum laudibus
iubilantium.

2 b. Spiritu ergo
iuncti Domino
simul dicamus:

3 a. Isti sunt sancti,

quos elegit Dominus

3 b. De mundo nequam,
vincant ut malitiam.

4 a. Iungitur Arthemius
pius invictis
martyribus ;

4 b. Choreas virginales
intrat Candida
et Paulina.

5 a. Post daemones victos
in terris,
post expugnata vitia,

5 b. Tandem coronantur
in caelis,
locati super sidera.

6 a. O quam felix
Petrus exorcista
et martyr fuit,

6 b. Per quem Deus
ad fidem martyres
tantos vocavit !

7 a. Dum enim carcer rumpitur,
in quo Petrus
inclusus detinebatur
impie,

7 b. Deperit infidelitas
Arthemii

martyris, Candidae et
Paulinae.

8 a. Hanc effugatus
reliquit daemon,
et Deus eam implevit
gratia,

8 b. Qua confirmata
iam virgo casta
martyrium pertulit
gloriosa.

9a. Hoc triumphavit
Arthemius
tunc ense mactatus ;

9 b. Hoc exspiravit
praecipitata
Candida rupe.

10 a. Hoc praemia

per Christum data
in pace meruerunt
aeterna,

10 b. Et eorum
pias animas
angeli deportarunt
ad Deum.

11 a. Supplices illis

ergo preces fundamus
dignas tantis
adiutoribus,

11b. Qui Christo regi
et magistro uniti
gloriantur
in caelestibus.

12 a. Sancte Arthemi
et Paulina virgo
et o Candida,
vestra nobis aeterna
impetrate gaudia,

12 b. Ut ad bravium
perducti supernum
laudes debitas
cum angelis persolvamus
ineffabiliter.

13. Hoc isti martyres
nobis praestabunt.