56. De sancto Augustino.

1 a. Turma plaudit caelica
Christo psallens cantica
Resonante musica,

1 b. Poli clangens regia
Boat in harmonia
Consona melodia.

2 a. Caelestis familia
Celebrat sollemnia
Non deficientia.

2 b. O quam felix curia,
Quam beata patria,
Ubi tanta gaudia !

3 a. Propter haec perennia
Augustinus omnia
Sprevit transitoria.

3 b. Quem Christi clementia
Peracta victoria
Laureatur gloria.

4 a. Hic a pueritia

Gradiens per devia
Multa gessit levia ;

4 b. Sed Domini gratia
Post multa dispendia
Ductus est in patria.

5 a. Matris eius precibus
Tractus ab erroribus
Iungitur fidelibus ;

5 b. Qui migrans de vallibus
Conscendit in montibus
Cum Christi clientibus.

6 a. Hinc divinis legibus
Novis et veteribus
Claruit in plebibus ;

6 b. Verbis et operibus
Pastum dedit ovibus
In Christum credentibus.

7 a. Mille per volumina
Vitae dans documina
Caeli pandit limina ;

7 b. Caeeis praebens lumina
Legis aufert tegmina
Per librorum fulmina.

8 a. Hinc pontificalia
Suscepit officia
In urbe Hipponia;

8 b. Fulsit in ecclesia
Sicut luminaria
In caelo lucentia.

9 b. Secus Christi formulam
Non habentem maculam
Sacram scripsit regulam ;

9 b. Eam diligentium

Et mundum linquentium
Maximum est praemium.

10 a. Gubernanti omnia

Laus honor et gloria
Per saecla manentia,

10 b. Qui nos victis hostibus
Augustini precibus
Iungat caeli civibus.