CAPUT II.

De dispositione membrorum interiorum serpentium et piscium et avium.

interiora vero et intestina serpentium in multis quidem sunt similia inferioribus quadrupedum ovantinm, et praecipue in interioribus lacertae : sed tamen serpens non habet festiculos intra vel extra, sed habet canales sive vias quae sunt similes viis seminalibus piscium : et matrices serpentium longae sunt, in duo divisae, sicut fere omnis animalis matrix dividitur. Alia vero interiora ejus fere similia sunt in interioribus lacertae : sed sunt longiora et strictiora, propter corporis sui arctitudinem ei longitudinem. Canna autem pulmonis serpentium longissima est, et, similiter stomachi eorum sunt longi valde : et extremum cannae superius est post os in inferiori parte aperturae oris : et linguae serpentium subtiles sunt et longae et nigrae et fissae in duo, et sunt acutae in extremitate, et ideo nimis protenduntur ante os ejus. Et in hoc convenit lingua cochi sive vituli marini : quia illa similiter est fissa. Venter autem sive stomachus serpentis, est strictus et longus, et similiter intestino amplo quod assimilatur intestino canis, per quod exit stercus. Habet autem post ventrem sive stomachum, intestinum subtile, quod in una extremitate continuatur portanario sui stomachi, et in alia extremitate pertingit ad anum, per quem exeunt superfluitates stercoris ejus. Habet autem cor propc collum suum : et hoc est parvum longum in adspectu figurae exterioris simile reni : propter quod quidam putaverunt, quod acumen cordis ejus ponatur in directo medii pectoris ejus ad anterius. Post cor autem in serpentibus est pulmo : et in eo sunt partes durae ac si sint nervosae, subtiles, involutae, longe pendentes a corde : quoniam illae sunt viae ramorum arteriae quae pervenit in ipsum. Post pulmonem autem in dextra quidem parte est hepar : et ipsum est longum extensum super ventrem suum. Splen autem serpentium est valde parvus et rotundus, similis spleni lacertae : et serpens habet fel simile felli piscium, et est super hepar. Fel autem viperae est acutissimum, et maximae virtutis ad abstergendum oculum : et est mirabile, quod in oculo non comparatur nocumento veneni sed salutari ad oculum purgandum. Quod autem dixi fel esse super hepar, est quidem verum in serpentibus magnis, sed in parvis est super intestinum.

Dentes autem serpentium sunt acuti et diversi, quasi non in uno ordine et figura existentes, et conjunguntur sicut dentes serrae, de quibus diximus superius : et testa capitis serpentium est os unum continuum solidum valde formatum sicut pyramis aliquantulum abscissa, et ab una parte involvitur in se sicut domus testudinis : sed involutio non durat nisi parum, et statim continuatur. Acutum autem hujus pyramidalis ossis ad os convertitur : et in basi ejus cerebrum ipsius, et non sunt in osse isto foveae oculorum : sed viae oculorum sunt per nervos per involutionem ossis ad ce-

rebrum ipsius pertingentes. Et hanc capitis serpentis anatomiam ego ipse expertus sum.

Ab hoc autem osse descendunt spondiles usque ad caudae extremitatem, et quasi continue diminuuntur, et sunt auriculae spondilium ejus valde modicae. In his autem per longitudinem corporis sunt costae insertae valde multae pares numero : quia in uno latere sunt tot quot sunt in alio : et sunt secundum numerum dierum mensis, hoc est triginta, et laxa junctura sunt ligatae cum spondilibus, et sunt musculi apud quamlibet, et nervi a nuclia ejus exeuntes : propter quod mobiles sunt hujusmodi costae omnes : et utitur eis serpens tam in spiritualium suorum et nutritivorum armatura, quam etiam in usu pedum : rapit enim totum corpus motu illarum costarum. Sunt etiam qui dicunt, quod serpentium oculis accidit hoc quod accidit oculis hirundinum, quod videlicet caecati per perforationem parvam revertatur visus in eis, quando sunt juvenes. Constat autem quod caudae serpentium et lacertarum recrescunt frequenter post abscissionem, sed non perveniunt ad longitudinem quam primo habuerunt.

Creatio autem ventris, hoc est stomachi et intestini serpentium, est similis creationi ventris et intestini piscium, et est de substantia duriori quam est nervosa. Est enim fere sicut substantia interioris tunicae arteriae : et hoc est ideo quia cibus durus non mollificatus in meri, descendit in ventrem talium animalium, et saepe collideretur nisi esset durus et fortis.

Adhuc autem calorem non contineret, sed vinceretur frigiditate circumstantis elementi nisi esset durus venter eorum. Dico autem similem esse ventrem serpentium ventri piscium, non solum creatione, sed etiam quia est unicus extensus in longum sicut venter piscium. Non enim diversificantur ventres modorum piscium, nisi in figura, et non in numero, aut creatione, nisi in paucis valde. In figur ei au- tem dico, quoniam forte ipse venter aliquorum similis est in intestino et in aliis, sicut piscis qui Graece vocatur chrachoros, qui piscis est ruminans, et non est notus in maribus et fluminibus nostris : hunc enim piscem oportet habere superius aliter figuratum ventrem quam alios, eo quod non fit ruminatio nisi villis latitudi natibus cibus in os reprojiciatur, et oportet cibum ante os superius stomachi reservatum esse.

Genera autem piscium et multa avium, proprium membrum inveniuntur habere, et hoc est quod habent ramos exeuntes a suis intestinis, tamquam unum intestinum in multa dividatur, sicut manus dividitur : et hoc invenitur in intestino salmonis, et in intestino piscis, qui similis est anguillae, sed. non est anguilla, sed brevior ea, et magnum habet hepar rotundum, qui apud nos vocatur alente : et quidam vocant eum alruptc : quidam autem simpliciter ruptam vocant. Sed aves quarum intestina praedicto modo dividuntur, non sunt notae apud nos : sed rami isti sunt in. avibus in parte inferiori cordis, tamquam sint in loco venae per quam cibus currit inter cor et hepar. In piscibus autem sunt in parte superiori. intestinorum, et forte erunt multi sicut in salmone, et forte pauci sunt in quibusdam aliis. Multi autem piscium carent ramis illis, sed habent intestina indivisa, sicut et alia animalia.

Amplius autem in speciebus majorum avium est magna diversitas suorum interiorum, major quam sit in aliis animalibus, quae sub uno communi genere alia genera subalternantis continentur, sicut genera piscium, et quadrupedum, et hujusmodi. Quaedam enim hujus ge neris animalium habent in anteriori suo sub collo interius papam, quae est a quibusdam dicta struma, et a quibusdam vocatur vesicula, eo quod creatio ejus est ex tela nervali sicut vesica, sicut gallus, et columba, et perdix, et spervorius, et aliae hujusmodi aves : et creatio hujus papae est ex. corio sive tela magna pro-

funda extensibili secundum extensionem cibi tumescentis: et in ipso continetur cibus indigestus. Et causa hujus est, quia stomachus talium avium est parvus, et aliquando spissae carnis et durae et non extensibilis, in quo non potest reponi cibus nisi prius amittat tumorem inflationis, sicut in gallina, et ansere.

Est autem haec papa in quibusdam avium parva et quasi rotunda, sicut in spcrverio, et columba : in quibusdam autem permaxima ascendens in collo usque ad linguae radicem, sicut in ansere. Et quaedam est avis alba major quam cygnus, cujus extensio alarum excedit quantitatem extensionis brachiorum hominis in utraque parte : et haec habet papam rubeam exterius prominentem permaximae quantitatis, sicut sit magnus saccus, et continuatur ad radices linguae ejus, et est avis aquatica valde longi rostri. Extremum autem superius hujus papae in omnibus papam habentibus, est magis angustum quam inferius, ubi ad os stomachi superius continuatur : et post extremum superius continue amplificatur, et extremum inferius ejusdem papae strictius est aliquantulum, quam superius os stomachi: quod fit ne cibus ad. stomachum cito crudus et intumescens descendat. Venter autem avium quarumdam sive stomachus creatur ex carne durissima fere inter omnes carnes omnium animalium, et interius operitur tunica dura valde et forti, eo quod frequenter dura permixta lapidibus in ipsum traiiciuntur, et laederetur a talibus si esset immunitus. Haec autem tunica faciliter excoriatur a stomacho ipsarum. Quaedam autem majorum avium, non habent papam, sed loco ejus habent meri amplum valde prominens ante collum. Aliquando autem non habent amplitudinem nisi in inferiori parte, ubi vicinatur stomacho ut in corvo, et ave quae guidem vel gaudes vocatur, quae secundum quosdam est falconum genus. Coturnices etiam habent illud quod ex membro vicinatur stomacho, latum, et similiter bubo, et anser agrestis secundum omne genus suum, et aquosus anser similiter.

Amplius autem quidam modi specierum avium inveniuntur, qui habent stomachos et ventres : quorum in quibusdam partibus creatio est ex simili substantia sicut substantia papae. Quaedam autem avium neutrum istorum habent: os enim stomachi sive meri non habent latum, et tamen non habent papam, sicut pica, et graculus. Habent autem loco hujus ventrem et stomachum longum : et hoc est praecipue avium parvarum sicut hirundinis et passeris. Tamen paucae aves carent papa et latitudine meri respectu earum quae habent eam. Quaedam tamen habent longitudinem meri valde, sicut illae quae habent longum collum, sicut grus et ardea : et stomachus harum avium est humidus, quia et tales aves aquaticae sunt, et ordinavit eis natura longum collum, ut per aquas ad locum cibi possint penetrare. Coturnices vero hoc habent proprium, quod et papam habent, et os stomachi latum et amplum. Intestinum autem volatilis quod subtus stomacho continuatur, est subtile strictum : et ejus involutio non est superius ubi attingit stomachum, sed inferius in quibusdam piscibus. Non enim in omnium modis est involutio intestini, sed in pluribus : et similiter est in quibusdam avibus, ut in gallo, et modis specierum anserum : et forte erit in multis avibus parvi corporis, sed parva est involutio illa, sicut est in passere.