58. De sancta Martha,

In 1. Vesperis.

Ad Magnificat.

1. Gaudeat ecclesia,

Exsultent omnes populi,

Vocum resultent moduli

Ad Marthae solemnia,

Quae sanctorum angelorum

Jam gaudet hospitio,

Cujus hospes det, ut sospes

Nostra sit intentio,

Qua secuti Christum tuti

Sub ejus imperio

Conversemur et laetemur

In coelesti solio.

Ad Matutinum.

Invitatorium.

Christo regi decantemus

Devotum praeconium,

Cui cum Martha praeparemus

Pectoris hospitium.

In 1. Nocturno.

Antiplionae.

1. Haec cum coeli conditorem

Hospita reficit,

Inimicum et ultorem

Virtute subjicit.

2. Christi verbis exsequendis

Miro vacat studio,

In quibus custodiendis

Multa retributio.

3. Haec est generatio

Quaerentium Dominum,

Cujus deprecatio

Fructus reddit seminum.

Responsoria.

1. Martha natu nobilis,

Sed vita nobilior,

In prosperis humilis,

In adversis potior,

Sprevit mundi gloriam

Et carnis lasciviam

Jam mente sublimior,

V. In camino caritatis

Fructum probans castitatis,

Omni vitro purior.

2. Decora facie

Refulsit moribus,

Pressit virtutibus

Legem superbiae

Subdens egregiae

Annos infantiae

Legis apicibus ;

V. Aetatis tenerae

Actus nobilitat

Et Christo vivere

Honeste cogitat.

3. Ut crescit corpore,

Crescit virtutibus,

Studet pro tempore

Piis operibus,

Quae regi omnium

Parat hospitium

Fideli pectore ;

V. Hujus praeconium

Attollat laudibus

Turba fidelium.

In 2. Nocturno.

Antiphonae.

1. In mundanae pravitatis

Pugnatura stadio

Supra femur castitatis

Se praecinxit gladio.

2. Si surgat tribulatio,

Deum habet refugium,

Si hostis persecutio,

Christus est adjutorium.

3. Constructo coenobio

Aggregat collegium,

Ut sicut laetantium

Fiat habitatio.

Responsoria.

1. Felix Martha sollicita,

Cujus exstat officium

Disponendi convivium,

Quo pascat sensu praedita

Christum, cui mente subdita

Pium praebet obsequium ;

V. Licet per ministerium

Turbetur erga plurima,

Ad unum necessarium

Fide currit promptissima.

2. O singularis gratia,

Christum in carne recipit,

Quem intus fide concipit

Imitandum per omnia,

Et spreta pompa generis

Exemplo Christi pauperis

Fit pauper voluntaria;

V. Non mundanis angustiis

Alteratur intentio,

Sed abjectis mollitiis

Se castigat cilicio.

3. Draconis ferocitas

Fit mitis et humilis,

Cum Marthae laudabilis

Supervenit sanctitas,

Et novo miraculo,

Quem armati populi

Non audent invadere,

Vinctum in signaculo

Crucis salutiferae

Comprehendit cingulo ;

V. Jam Judith audacia

Per hanc innovatur,

Dum plebs liberatur

Sub ejus potentia.

In 3. Nocturno.

Antiphonae.

1. Cantate Domino

Devotis vocibus

Martha sedibus

Fruitur superis,

Jam vitae veteris

Elapso termino.

2. Exsultet terra laudibus

Et laetentur insulae

Pro laudis operibus

Tam felicis famulae.

3. Quia mirabilia

Per hanc fecit Dominus,

Expellantur eminus

Carnis odibilia.

Responsoria.

1. Jam de vita meliori

Martha felix anxia,

Addit laborem labori

Mira patientia,

Artam vitam artiori

Stringens abstinentia ;

V. Structo namque coenobio

In Christi patrocinio

Sacra vocat consortia.

2. Ecce, jam dies exitus

Advenit opportunus,

Ecce, jam Marthae spiritus

Post gloriosum obitum

In coelis collocatur

Et jam obtenta gloria,

Quem pavit in Bethania,

In Sion speculatur ;

V. Felix atque laudabilis,

Quae facta quondam humilis,

Nunc coelo sublimatur.

3. Descendit de caelis

Christus ad funebria

Hospitae fidelis,

Res digna memoria,

Nam adstante populo

Corpus sanctae famulae

Cum Frontone praesule

Mancipavit tumulo ;

V. O felices exsequiae,

Quae summi regis gloriae

Decorantur praesentia.

In Laudibus.

Antiphonae.

1. Angelis paulominus

Deo fit placabilis,

Quam dilexit Dominus

In altis mirabilis.

2. In procella saeculi

Stat fortis ut leo,

Ergo, cuncti populi,

Jubilate Deo.

3. Ut nil agat perperam,

De supernis certa

Vitam ducit asperam

In terra deserta.

4. Benedicant humiles

Deum super omnia,

Qui natura debiles

Goronat victoria.

5. Jam coelis imperantem

Laudat plena virtutibus,

Quem pavit conversantem

In terris cum hominibus.

Ad Benedictus.

A. O bonitatis speculum,

Ministra pietatis,

Castitatis cingulum,

Magistra sanctitatis,

Succurre te colentibus

Tuis benignis precibus,

Ut consummato stadio

Tecum tuo suffragio

Laetemur in hospitio

Supernae civitatis.

In 2. Vesperis.

Ad Magnificat.

A. Quam benedicta femina,

Quae meruit recipere

Christum lavantem crimina

Potaque cibo pascere

Mensaeque tanti Domini

Vitam activam agere.