59. De sancto Augustino.

1 a. Voce laudis, Sion, gaude,
Plaudant astra nova laude
Cum ingenti gloria ;

1b. Augustini confessoris,
Praeclarissimi doctoris,
Exsultent memoria.

2 a. Hic doctor philosophiae,
Qua caelestes ierarchiae
Probantur catholice ;

2 b. Per creata de creante
Haec ars fide mediante
Disputat rhetorice.

3 a. Huius doctor veritatis
Librum scripsit trinitatis
Excellenti lumine ;

3 b. Astra scandit contemplando

Ut aquila speculando

Spiritus acumine.

4 a. Hapresiarchas confudit,
Disputando dum excludit
Sectas horum varias,

4 b. Sagittasque Iudaeorum
Pharetra theologorum
Damnavit nefarias.

5 a. More solis orbi lumen,
Verum paradisi flumen
Rigans omne saeculum.

5 b. Quis se novit tibi parem,
Per doctrinam salutarem
Omnis cleri speculum ?

6 a. O columna Dei templo.
Verbo docens et exemplo
Gratia largiflua;

6 b. Arbor paradisi lata,

Toti mundo fructu grata,
Poma dans melliflua.

7 a. Vere stella radiosa
Caligine nebulosa
Et lucerna praevia;

7 b. Dux fidei, flos doctorum,
Nos ad gaudia iustorum
Duc per mundi invia.

8 a. Summe doctor, Augustine,
Apotheca medicinae,
Nubes roris gratiae,

8 b. Pro filiis, pater, ora,

Aegris gratiam irrora

Cum fructu iustitiae.

9 a. Doce nos in fide Christi
Capere, quae docuisti,
Tenaci memoria

9 b. Sic, ut tecum sine fine,
Felix pater Augustine,
Laetemur in gloria.