Acta Apostolicae Sedis - Commentarium Officiale582

CRACOVIEN.

Canonizationis Beati Stanislai Kazimierczyk, sacerdotis professi Ordinis

Canonicorum Regularium Lateranensium (1433-1489)

DECRETUM SUPER MIRACULO

Beatus Stanislaus Sołtys - melius sicut Stanislaus Kazimierczyk notus,

quia natus in Kazimierz in suburbio Cracoviae die 27 mensis Septembris anno

1433 - e familia quadam medii gradus socialis bonam accepit humanam

christianamque formationem. Ad religiosam vocationem a Deo vocatus, in

Ordinem Canonicorum Regularium Lateranensium acceptus est, atque, votis

nuncupatis, sacerdos ordinatus est. Mandatum deinde accepit praedicatoris et

confessarii in ecclesia Corpori Christi dicata, dum sua in communitate religiosa

munus vices gerentis moderatoris, magistri novitiorum et adiutoris theologiae

exercuit. Beatus, qui maxime a confratribus et fidelibus aestimabatur, mi-

nisterium cum zelo plenaque deditione adimplevit, peculiari cum sollicitudine

erga pauperes et aegrotos. Vita eius spiritalis devotione erga Sanctissimum

Sacramentum eminuit, nec non speciali veneratione erga Virginem Mariam

atque austeritatis vitae studiisque perfectionis plaeclara dedit specimina. Eius

praedicatio, simplex et essentialis, ita multos attrahebat, ut etiam ex finitimis

regionibus cuiusque ordinis socialis fideles ad eum audiendum venirent. Die 3

mensis Maii anno 1489 in Kazimierz pie in Domino obiit. Die 21 mensis

Decembris anno 1992 Summus Pontifex Ioannes Paulus II Decretum confir-

mationis cultus a tempore immemorabili promulgavit atque die 18 mensis

Aprilis anno 1993 sollemni celebrationi eius beatificationis praefuit.

Canonizationis intuitu, Postulatio Causae examini huius Congregationis

de Causis Sanctorum coniectam tradidit miram sanationem cuiusdam nobilis

Poloni Petri Komorowski, qui anno 1600, forsitan post infectionem trauma-

ticam, in militari actione oculum amisit dexterum atque, quibusdam trans-

actis annis, etiam altero oculo captus est. Ob dolorem coactus est ut aegro-

tantem partem fascia substringeret. Patiens, credens et beatum Stanislaum

diligenter colens, eius adiit in ecclesia Corpori Domini dicata sepulcrum, eius

implorans intercessionem ut a gravissima sanaretur infirmitate. Duobus

exactis diebus, die 17 mensis Maii anno 1617, evenit, cum quadam mutatione

anatomica et functionali oculi sinistri, inopinata sanatio cum omnium gravis

morbi indiciorum dissolutione, sine usu peculiaris curationis. Evidens exstat

congruentia temporis atque nexus inter invocationem ad Servum Dei et Petri