62. De s. Petro Oxomensi.

In 1. Vesp eris.

Super Psalmos.

A. Felix esultet Oxoma

Praeclarae laudis victima

Praeconio fecundo

In hujus almi praesulis

Petri miris miraculis

Concentu laetabundo.

Ad Magnificat.

A. Lux refulget in tenebris

Mundialis erroris,

Spirat in cordis latebris

Spiraculum amoris,

Absit procella funebris

Diutini languoris;

Nostris sit quies palpebris

Sordis spretis illecebris

Salvifici soporis,

Hujus patroni meritis

Nos coronet in superis

Diadema decoris.

Ad Completorium.

Super Psalmos.

A. Sacrificans justitiae

Devotum sacrificium

Spem habuit fiduciae

Finalem complens terminum.

Ad Nunc dimittis.

A. Lumen possedit gentium

ad revelationem,

Dum duxit, quod inceperat,

ad consummationem.

Ad Matutinum.

Invitatorium.

Adoremus, Christicolae,

Regem aeternitatis,

Qui coronavit hodie

Petrum cum trabeatis.

In 1. Nocturno.

Antiphonae.

1. Hic vir culmen abhorruit

Honoris pestilentis

Et in via non abiit

Populi delinquentis.

2. In virga rexit ferrea

Deliros a virtute,

Quos ab Aegypti terrea

Subtraxit servitute.

3. De monte sancto Dominus

Orantem exaudivit,

Quem cunctis nihilominus

In bonis stabilivit.

Responsoria.

1. Solemnis instat dulia

Sacrosanctae diei,

In qua coelorum curia

Tam admirandae rei

Applaudit et conjubilat,

Et velut aurum rutilat

Corona speciei,

V. Quae Petro datur praesuli

Pro labore multiplici

In aula summi Dei.

2. Praeclusis mundi cladibus

Humilitatis gradibus

Ad Dei scandit numen,

Famae fragrans odoribus

Compaginat in moribus

Constantiae bitumen,

V. Vir gloriosus meritis

His, quae sordescunt, veritis

Divinum nactus lumen.

3. Altitonans antistitem

Laudans ex coelibatu,

Quem in mundo superstitem

Protegens a reatu

Non gratiae participem

Hunc labi vult a statu,

V. Carnis declinans fomitem,

Mentem virtutum comitem

Teneos in dominatu.

In 2. Nocturno.

Antiphonae.

1. Signavit sanctum lumine

Redemptor sui vultus,

Quem sustulit de flumine

Procellosi tumultus.

2. Mane constanter adstitit

Ante Dei conspectum

Atque pro reis praestitit

Vas precum praeelectum.

3. Paulominus ab angelis

Hunc Deus minoravit,

Quem sic in sacrificiis

Digniorem monstravit.

Responsoria.

1. Rector urbis

praesedit dinutae

Et eversae

pastor ecclesiae,

Aggregator

novae familiae,

V. Hic divinae

possessor gratiae

Hostem stravit

omnis fallaciae.

2. Desudavit in stadio

Sub hujus lucis radio

Vir Domini praeclarus,

De crucis patrimonio

In ejusdem praeconio

Non exstitit avarus ;

V. Qui functus sacerdotio

Scripturae vacat otio

Cupidinis ignarus.

3. Electum simoniace

Juxta sacros ecclesiae

Pontifices sepultum

Sacer exhumat pontifex,

Hoc summus probat artifex

Divinitus consultum,

V. Praesumptionis vitium

Deus, pater felicium,

Non praeterit inuitum.

In 3. Nocturno.

Antiplionae.

1. Justus in tabernaculo

Dei fit habitator,

Nam exstitit in sacculo

Veritatis amator.

2. In benedictionibus

Dulcedinis praeventus

Est Dei visionibus

Gratuitis contentus.

3. Hic innocens est manibus

Purus et mundus corde,

Immunis ab inanibus

Verbis et omni sorde.

Responsoria.

1. Hic Dei primicerius,

Ut Domino liberius

Duo daret minuta,

Quod deprimit exterius,

Perdomuit austerius

Reflorens mente tuta,

V. Ut Christum lucrifaceret

Et spem in ipsum jaceret,

Electa tulit scuta.

2. In pastorali baculo

Gregem ab hostis jaculo

Viriliter defendit,

Quem pascens in umbraculo

Ab aestu et obstaculo

Tentorium extendit,

V. In caritatis titulo,

Humilitatis nidulo

Errores reprehendit.

3. Vita, morte

signa mirifica

Confessoris

prece salvifica

Dei virtus

patrat magnifica ;

V. Aegris cunctis

medela praevia

Restauratur

fide propitia.

In Laudibus.

Antiphonae.

1. Indutus fortitudine

Conregnat cum beatis

Vir plenus celsitudine

Perfectae sanctitatis.

2. Deo jubilatio

Et congratulatio

Omnis sit honoris,

Quem Petri confessio

Laudat et professio

Vitae melioris,

3. Ad te de luce vigilat,

Lux luminis amator,

Sic satias, ut sitiat

Hic tuus imitator.

4. Pontus, tellus et aetbera,

Sol, luna, cuncta sidera

Benedicant factorem,

Qui tot signa mirifica

Manu patrat salvifica

Per suum confessorem.

5. Exsultans cum coelicolis

Carnis exutus vinculis

In gloria laetatur,

Crebris fulgens miraculis

Virtutum propugnaculis

Reis patrocinatur.

Ad Benedictus.

A. O solaris radii

Jubar luminosum,

Perlustrantis stadii

Gyrum circulosum,

Nostrum, Petre, nubilum

Valde tenebrosum

In laudis nunc jubilum

Transfer gloriosum.

Ad Horas Antiphonae.

Ad Primam.

Vir Belial nefarius

Et legis adversarius

Anathematizatus,

Attemptans sanctum perdere,

Arreptus est a daemone,

Sed prece liberatus.

Ad Tertiam.

Piscem mandens

hostis febricitans

Benedictum

saluti redditur

Et in sancto

Deum magnificans

In utraque

prorsus reficitur.

R. Signifer immense,

cui vovet eonflaa gens se,

Civibus extensae

coeli nos suscipe mensae,

V. Irae succensae

nusquam paveamus ab ense.

Ad Sextam.

Aqua manans ex ilico

Natura prorsus obice

Se manibus et siti

Obsequiosam praebuit,

Hoc signum multos perculit

Rumoris inauditi.

Ad Nonam.

Proselyta paralysi

Et nervarum multiplici

Laesura dissoluta

Est patris patrocinio,

Ut vulgi vult opinio,

Saluti restituta.

In 2. Vesperis.

Ad Magnificat.

A. Absorpta lucis anima

Luce fruitionis

Exsultat in laetitia

Perfectae visionis,

Petre, pro nobis obsecra,

Dum tempus est agonis,

Ne nos clades pestifera

Demergat Pharaonis.

Infra Octavam.

Ad Benedictus.

A. Benedictus rex Israel,

Deus noster Emanuel,

Qui Petro suo famulo,

Ut lucem daret populo,

Virtutum affluentiam

Dedit et plenam gratiam ;

Sicque complens fideliter

Adsumitur feliciter

Regnaturus cum Domino

In aeternum.

Ad Magnificat.

A. Ave, speculum Oxomae,

Lux et decus ecclesiae,

Unice pater pauperum,

Singulare remedium,

Cunctis ad te clamantibus

Deum redde propitium.