Congregatio de Causis Sanctorum 587

NEAPOLITANA

Canonizationis Beatae Iuliae Salzano, fundatricis Congregationis Sororum

Doctrinae Christianae Institutricum a Sacro Corde (1846-1929)

DECRETUM SUPER MIRACULO

Beata Iulia Salzano, in urbe S. Maria Capua Vetere prope Casertam die 13

mensis Octobris anno 1846 nata, cum patre orbata esset, apud orphanotro-

phium a Sororibus Caritatis rectum in pago S. Nicola La Strada (CE) vulgo

nuncupato humanitate ac religione imbuta est. Doctrinae non minus quam

familiae adeo fuit devinctissima, ut, studiis summa cum diligentia laudeque

perfectis, statim promota sit ad munus ludi magistrae puerulis elementariis

instituendis in schola publica civitatis Casoriae prope Neapolim exercendum.

Cum autem constanti ac sincero animo fidem vivendo experiretur, doctrinam

in ludo traditam catechesi enarrandae cumulare instituit, neque solos pueros,

verum etiam cuiusvis aetatis condicionisve adultos homines, velut futuri

temporis praenuntia, sedule docuit et amore Beatae Virginis et Sacratissimi

Cordis Iesu, cuius fuit propugnatrix assidua, inflammavit. Propter pretiosum

cathecheseos donum a Spiritu eidem concessum, Beato P. Ludovico de

Casoria suadente, Congregationem Sororum Doctrinae Christianae Institutri-

cum a Sacro Corde condidit, in qua vitam consumpsit principium, quod sibi

proposuerat, explicando: « quamdiu vel tenui filo vitae pendebo, praecepta

Christi tradam ». Die denique 17 mensis Maii anni 1929 sancte religioseque

vita functa est. Beatificationis ritum Ioannes Paulus II, Pontifex Maximus,

die 23 Aprilis anni 2003 peregit.

Optatae canonizationis proposito, Causae Postulatio prudenti huius

Congregationis de Causis Sanctorum iudicio prodigialem, quam ferunt,

sanationem subiecit dominae Mariae Gratiae Pelliccia, Afragolae prope

Neapolim die 6 Novembris 1952 natae, quae Neapoli anno 2005 mirum in

modum consanuisse dicitur. Cum enim in raeda gubernanda adverso casu

graviter afflictata esset, comatis statu extremum iam spiritum Neapoli in

valetudinario a Cardarelli nuncupato ducebat propter plurima vulnera et

laesiones complures, quae illa secutae, vitalia in corpore sauciaverant, ut

medici existimaverunt. Cum autem res in peius verterent propter

insufficientem respirationem, medici, qui interea suffusionem pleuricam

cum vulnere arteriae magnae invenerant, aegrotam mechanicae, ut aiunt,