67. De s. Thoma Cantuariensi.

In 1. Vesperis.

Ad Magnificat.

A. Honorabilis Angliae,

Acceptabilis Galliae,

Desiderabilis ubique

Dux evangelice,

Legate apostolice,

Praeco Dei in finibus terrae,

O Thoma, digne

Apostolico nomine,

Qui reges et nationes

Incredulas

Christo lucraris,

Ora pro nobis.

Ad Matutinum.

Invitatorium .

Exsultemus Domino,

Summi regis filio,

Qui beato Thomae palmam

Dedit et victoriam.

In 1. Nocturno.

Antiphonae.

1. Gloriosus intras caelum

Quasi praesul intra velum

In cruore proprio,

Te precamur, ut post mortem

Capiamus per te sortem

Lucis participio.

2. Rex saeculorum,

Quem laudat universa

Substantia rerum

Per te creatarum

Exaudi te affantes

Et tui Thomae

Festo jubilantes,

Christe, salus nostra

Et finis expectationis nostrae.

3. Ave, mitissime

Martyr Thoma, suscipe

Laudis sacrificia

Nostrae, nobis impetra

Verae lucis gaudia.

In 2. Nocturno.

Antiphonae.

1. Exsultemus et laetemur

In Domino

Et non parcentes vocibus

Christo laudes referamus.

2. Nullus ergo

peccator sileat,

Sed hunc justum

laudare studeat.

3. Ora nunc, piissime,

Angelo simillime,

Pro nostris excessibus,

Martyr inclite,

Et fave te poscentibus.

In 3. Nocturno.

Antiphonae.

1. Laude tua, Deus, os

nostrum repleatur,

Ut patris Thomae festum

digne recolatur.

2. Inclinata dies

solitam noctem minitatur,

Fac, pater, ut sol justitiae

nobis oriatur.

3. Juxta nomen coronatus

Es splendore decoratus

Infinitae gloriae,

Thoma, martyr piissime.

In Laudibus.

Antiphonae.

1. O martyr Thoma praepotens,

Jam pace Christi perfruens,

Ornas polum praesentia,

Terris ades potentia.

2. Thomas, exsul a patria,

Coeli regnat in curia,

Bonis repletur moribus,

Quibus Dei fragrat domus.

3. Portas mortis et inferni

Nesciant tui famuli,

Sed portas paradisi resera

Potestate tibi tradita.

4. Laudemus Dominum,

quod doctrina

beati Thomae

multi per orbem

universum edocti

ad Christi clementiam

pervenerunt.

5. Condigne

Thomas Cantuariae

Recipitur

honorificentissime,

A quo omnes

optabant benedici,

Cui jure canebant:

Benedictus, qui venit

In nomine Domini.

Ad Benedictus.

A. Egregie Dei martyr Thoma,

Offer pro nobis

hostias placationum

Et thymiama precum,

Ut his expiati

Te laete sequamur

Ad sancta sanctorum,

Ubi Christus

Magister introivit

Et te martyrii

Gloria coronavit.

Ad Primam.

A. Ereptus a formidine

Regnum tenet jam libere

In paradisi lumine

Et virtutum dulcedine,

Fragrantiam coelestium

Thomas spirat aromatum,

Non exsilium, gladium

Illi nocebit amplius.