71. De sancta Barbara.

la. Plausu chorus iucundetur
Novo Sion et laetetur
Tanti flore germinis,

1 b. Fecundatus quem probavit,
Te prae multis dum signavit
Sacri rore numinis,

2 a. Rex a thronis ; sic benigna
Mundo luces et per signa
Lacis fundis radium ;

2 b. Sic oppressum redivivo
Fructu signo fulta divo
Matri reddis filium.

3 a. Sic afflictos fastu leprae
Mundas, munda necis vepre,
Servans et a carie ;

3 b. Sic cervici frontem plexam
Rite nectis et adnexam
Donis aptas gloriae.

4 a. Hinc columnas sacramenti,
Novi decus testamenti,
Signo crucis indice

4 b. Pingis, omnique decenter,
Tamquam divo sint recenter
Picta, vigent pollice.

5 a. Clave mortis rubricata,
Templo solis praesentata
Vitae reddis corpora ;

5 b. Hos exsangues, mutilatos,
Hinc et inde cancellatos
Conducis ad robora.

6 a. His insignis, his praelata
Polles signis in stellata
Throno regis filia.

6 b. Sole novo deaurata
Micas stellis scintillata,
Sub te vernat Cynthia.

7 a. Eia, victrix et alumna,
Laborantes in aerumna
Nos tuo charactere

7 b. Signa, tecum constituti
Quod te duce simus tuti
Pharaonis onere.