22. Cantio de s. Jacobo.

1. Dum pater familias,

Rex universorum,

Donaret provincias

Jus apostolorum,

Jacobus Hispanias,

Lux illustrat morum.

2. Jacobi Gallaecia

Opem rogat piam,

Glebae cujus gloria

Dat insignem viam,

Ut precum frequentia

Cantet melodiam.

3. Jacobo dat parium

Omnis mundus gratis,

Ob cujus remedium

Miles pietatis

Cunctorum praesidium

Est ad vota satis.

4. Jacobum miraculis,

Quae fiunt per illum,

Arctis in periculis

Acclamet ad illum,

Quisquis solvi vinculis

Sperat propter illum.

5. O beate Jacobe,

Virtus nostra vere,

Nobis hostes remove

Tuos ac tuere

Ac devotos adhibe

Nos tibi placere.

6. Jacobo propitio

Veniam speremus

Et, quas ex obsequio

Merito debemus,

Patri tam eximio

Dignas laudes demus.

R Primus ex apostolis

Martyr Jerosolymis,

Jacobus egregio

Sacer est martyrio.