78. De sancto Bartholomaeo.

1 a. Tradit nobis festivale
Laete decus triumphale
Bartholomaei natale

Carmen Christo promere,

1b. In quo curemus demere
Quod gestabamus temere,
Ut possit resipiscere,
Quod fuerat letale.

2 a. Cuius sanctus illustratur
Et doctrinis fecundatur,
Hac in die iucundatur
Beatorum contio,

2 b. Excelsa praedicatio
Instinctu Dei praevio
Dat viam cordi devio,
Ad vitam qua meatur.

3 a. Fructum profert quo salutis,
Via tuta fit non tutis
Victis Astaroth versutis
Et Berith dogmatibus ;

3 b. Extraxit ab erroribus
Imbutos vagis moribus
Sacrosanctis sermonibus
Idolatris abnutis.

4 a. Maerent hostes adiurati,
Sancti verbis debellati,
Qui fuere machinati
Augere flagitia.

4 b. Sed multor per incendia
Quoddam inquit immania
Daemonium praesentia
Apostoli beati.

5 a. Victum reddit se percepto
Bartholomaei praecepto,
Calle fugiens arrepto,
Idola comminuit ;

5 b. Discedens hostis doluit,
Compulsus qui succubuit ;
Aeternum Deum docuit
Nam populo decepto.

6 a. Rursus hostis catenatus
Ab angelo reportatus,
Coram plebe propalatus
Picea sub specie.

6 b. Auctorem tantae gratiae
Laudabant fines Indiae,
Per signa cuius hodie
Abluitur reatus.

7 a. Rex, ab hoste qui torquetur,
Dum beatus vir medetur
Suam natam, profitetur
Messiae potentiam.

7 b. Effervens per dementiam
Astriages insaniam
Et irae fert sententiam,
Ut capite plectetur.

8 a. Veram pacem interpella,
Ut sequestret nostra bella,
Nos defendat a procella
Animae naufragii ;

8 b. Aeterni ne supplicii
Cernemur nos obnoxii,
Ne dira lux iudicii
Det merita flagella.