79. De sancto Basilio.

1. Vox respondens moribus
Magnum magnis laudibus
Attollat Basilium,

2 a. Qui doctrina celebris
Ut lumen de tenebris
Emersit gentilium ;

2 b. Lucens et illuminans,
Verbum vitae seminans
Delet dogma devium.

3 a. Non renatus gratiae
Studet abstinentiae,
Sequens castimoniam ;

3 b. Nil terrenum diligit,
Puros sensus dirigit
In omnem iustitiam.

4 a. In fervore spiritus

Docens, doctus caelitus
Doctum trahit Eubolum
Ad salutis symbolum.

4 b. Qui, dum sibi desipit
Et in Deum resipit,
Datur tanto rhetori
Christo posse commori.

5 a. O quam dignum
Lucis signum
Demonstratur,
Dum lavatur

In aqua Basilius ;

5 b. Aquam movet,
Sanctum fovet
Plausu blando
Revolando

Columba sublimius.

.6 a. Gregis rector
Et protector,
Hic profanis
Arrianis

Resistens instantius,

6 b. Iram regis

Non veretur,
Dei legis
Dum tuetur

Decreta constantius.

7 a. Suis verbis consecrare
Sancta volens videt clare
Sibi Christi praesentiam
Dare sacrandi gratiam.

7 b. Dum ministrat cum tremore,
Dulces modos in splendore
Modulantes apostoli
Demulcent aures Euboli.

8 a. Omni plenus sanctitate,
Dignus Dei claritate,
Consummatur
Et beatur

Cum sanctis in gloria.

8 b. Nos asstantes tuae laudi,
Magne pater, pius audi,
Ut te duce
Vera luce

Fruamur in patria.

9. Amen dicant omnia.