82. De sancto Benedicto.

1 a. Sonet vox ecclesiae
Canticum laetitiae
Benedicti gratia.

1 b. Benedictum hodie
Venerantes carie
Careamus noxia.

2 a. Suscitatur mortuus,
Fons datur irriguus
Eius prece praevia.

2 b. Mortis parant poculum,
Sed crucis signaculum
Servat a versutia.

3 a. Sancto cedit caecitas,
Firmatur debilitas,
Pelluntur daemonia.

3 b. Fel in pane tegitur,
Sed a corvo tollitur
Velata malitia.

4 a. Dementata femina
Tangens sancti limina
Purgatur dementia.

4 b. Nullus abit vacuus,
Qui petit assiduus
Eius beneficia.

5 a. Hic exemplar posteris
Regnat iam cum superis
In caelesti patria.

5 b. Huius prece miseris
Largiatur celeris
Peccatorum venia.