87. De sancto Bertrando.

la. Sancti festa confessoris
Recolamus et canoris
Exsultemus modulis.

1b. Gratulemur mente pura
Prosequentes cordis thura
Labiorum titulis.

2 a. Digne decet venerari,
Digne diem praeconari
Virtutis significum,

2 b. Cuius fulsit insignita
Documentis sanctis vita
Laborum et operum.

3 a. Homo verus, homo purus,
Mundo blandus, sibi durus,
Carnis calcans lubricum,

3 b. Contra carnem dimicavit
Et se totum transformavit
In statum angelicum.

4 a. Vicit carnem, vicit mundum,
Vicit fortem et immundum
Hostem Adae veteris.

4 b. Et his tribus conculcatis
Summae cultor trinitatis
Conregnat cum superis.

5 a. Hospes [hic] caelestis poli,
Se subducens carnis moli,
Sequens spiritalia,

5 b. Dum a carne se suspendit,
Supra carnem comprehendit
Angelorum gaudia.

6 a. Ubi totus mente tota,

Non impulsus mundi rota,
Sed spe firma stabilis

6 b. Christi leve tulit onus,
Pastor lucis, pastor bonus,
Pius, prudens, humilis.

7 a, Lignum frondens, vitis viva,

Palma florens et oliva

Gratiae fructifera,

7 b. Fructum dedit Deo gratum
Et transcendit orbis statum
Cedrus odorifera.

8 a. Se praecingens castitate,
Cum lucernae claritate
[Vigil] in excubiis

8 b. Pernoctavit exspectando,
Nuptiarum sponsus quando
Rediit a nuptiis.