90. De sancta Caecilia.

1. Victo mundi lubrico
Gaudio uranico
Fruitur Caecilia.

2a. Concupitam specie
Rex coronat hodie,
Gaudeat ecclesia,

2 b. Eius ut auxilio
A mundi exsilio
Perennet in patria.

3a. Sponsi mora taedio
Dormitante medio
Nocte vox fit nuntia:

3 b. En, sponsus progreditur.
Dum occursus sumitur,
Properat industria.

4 a. Haec sponso eximitur
Et lumbos praecingitur,
Fit processu prospero
Prudentum in numero.

4 b. Praecellens amictibus,
Fragrans aromatibus,
Mirra, gutta, cassia
Sponso venit obvia.

5 a. Hinc indultus
Est hic cultus,
Hoc decoris
Habet foris,

Sed ab intus gloria.

5 b. Ne quid tardet,
Lampas ardet,
Incentivum
Dat olivum

Nuptiarum gaudia.

6 a. Igne sancto carne fixa,
Corruptelis crucifixa,
Caelebs in convivio

6 b. Coniugalem animalem
Lucrifecit et subiecit
Fidei mysterio.

7 a. Sponsi fratrem conlucrata,
Fide passim propagata,
Almachio mancipio
Necis donatur bravio.

7 b. Sic transcursa mundi lucta,
Per angustum iter ducta
Satum maeroris anxio
Fructum metit in gaudio.

8 a. Nostrum cursum ducat sursum,
Ut expleta cursus meta
Absolutis ab occultis
Det ovantes sabbata.

8 b. Ubi bono singulari
Nobis palam satiari,

Unum trinum contemplari
Dei dent charismata.

9. Amen dicant omnia.