87. In s. Aemiliani abbatis.

1. O magne rerum, Christe, rector inclite,
Parent olympi perpetim cui sidera,
Tu vota festis annuis faventia
Largire nobis, casta praebe et sobria,
Placare possint quae tuam clementiam.

2, Plebs, ecce, cuncta debitum recursibus
Solvit dierum prona corde et corpore,
Confisa mente deprecans suffragium,
Ut singulorum ponderata questibus
Sustollat alma pectora indulgentia.

3. Laetum rependit carminum concentibus
Cantum, sonoro pangit ore et faucibus,
Tua petentes supplices ut dextera
Probrosa tollens acta nostra corrigas,
Sis et malorum fautor intus flentium.

4. Semper petentes impetrare poscimus
Nostris medelam morbidis et moribus,
Si nos benignus et pius respexeris,
Qui tanta tantis contulisti servulis,
Ut nil patrono desit isti gratiae.

5. Culpas gementes pandimus miserrimi,
Non obsequelam perdituri credimus,
Cum copiosa poscitur potentia
Reis assistat supplicator optimus,
Qui flectat iram proteratque noxia.

6. Ne quid beatis sentiat cohortibus
Hostis rebellis pullulare casibus,
Nefas caducum germinare odia,
Fraudem dolumve permoveri machinis,
Flammas pudicis conflagrarc liliis.

7. Haec mente rite fixa dum revolvimus,
Libet dicatum praedicare servulum,
Tuum ministram, Christe Iesu, vernulum,
Ut, festa mixtis gaudiis cum pangimus,
Sequatur inde tota te laudatio.

8. Tu sacra templa, tu pater, caelestia
Habes sacrata, tu Deus, per saecula
Regno potiris et regis praesentia,
In, sancte, sanctis cerneris mirabilis
Regnansque solus mira factis exseris.

9. Hinc obsecramus expiari munere,
Redire prorsus ut sinas iam perditos,
Caeli receptes collocesque in regia,
Qui das, resurgant ut perempta corpora,
Concede, corda ut calescant gratia.

10. Nostrum reatum confitentes prodimus,
Frenetur ictus, occidat sententia,
Qua rodit atra dira conscientia,
Rogare donat cum voluntas prospera
Tuam patentem prodigos ad ianuam.

11. Momenta nulla transvolant in tempora,
Quae labe non sint sordidata criminis ;
Succedat ante, quaesumus, contagiis
Ut digna nostris pessimis purgatio,
Quam reddat ultrix poena factis debitum.

12. Videmus orbos restitutos lumini
Claudosque plantis exsilire vividis,
Consumpta tabe membra convalescere,
Mortis sopore pressa demum surgere,
Laetos deinde convenire sospites;

13. Tortos repelli et fugari daemones,
Tormenta poenis eiulantes perpeti,
Anguis venenum versipellis angeli
Suo latenter confodiri vulnere
Suisque telis sauciatum conteri.

14. Ut conditoris haec patent miracula,
Sic claudicantes mentis aegritudine
Serpens repulsus deserat nequissimus,
Sic nigra corda nubilo socordiae
Fulgore sudo praemicent clarissima.

15. Haec nempe virtus Christus est tutissima,
Aemilianum quae tulit per ardua,
Vitae tropaea quae coronat praemio,
Nostris ut esset saeculis sectabilis
Foretque fortis advocatus infimis.

16. Hymnite mecum consonante carmine,
Narrate cuncta, praedicate et psallite,
Regi perenni, cuius haec sunt omnia,
Nostri resultent cantici clamoribus
Polique templi resonent concentibus.