175. In sancti Thyrsi.

1. Exsulta nimium, turba fidelium,
Sollemne hodie martyris incliti
Est festum, modula carmina fortiter
In laudem Domini atque potentiam.

2. Caelestis patriae gaudia cogitans
Thyrsus vi reppulit omnia saeculi
Sanctus, cum minime crederet in Deum,
Adflatus subito flamine sancto est.

3. Saevum conspiciens iudicem increpat:
Cur sanctos Domini, inquit, atrocior
Poenis discrucias valde crudelibus?
Infelix erebi igne cremandus es.

4. Ilico rabidus tempore presserat
Hostis Cumbricius membra colentium
In terra Dominum, multa perempta sunt
Sanctorum nitida milia martyrum.

5. Sanctus pro Domino Leucius nititur
Electam animam tradere potius,
Diversa genera pertulit innocens
Poenarum cupiens praemia caelica.

6. Athleta pedibus impiger ambulans
Thyrsus, regem ubi repperit impium,
Apprendens tenuit, admonet et docet,
Iam falsa ut colere idola temneret.

7. Tunc laeto simulans ore locutus est:
Tu, Thyrse, cupio, consilio meo
Assensum tribuens saerifices diis,
Ut magnam accipias copiam munerum.

8. Sanctus: Perspicuum est, ait, impie,
Quod totus habitet ille nequissimus
In te nunc coluber pravus et invidus ;
Cum tali pereas principe horride.

9. Gastrum perniciter adfore praecipit
Plenum lympha, caput martyris suffocat,
Corpus, quod superest, fustibus caederc
Nodosis acrius pestifer imperat.

10. Sed servus Domini voce piissima
De vase miserum iudicem increpat:
Agnosce Dominum, lubrice et invide,
Cum cernis opera magna et inclita.

11. Turris construitur altius eminens
Per gyrum gladiis fixis in ordinem,
Almus (ut) fastigio positus decidens
Ense susciperet membra fidelia.

12. Magnus tu, Domine, es prae diis omnibus,
Multum mirificus in te credentibus ;
Pravis muscipula, sanctus in aethera
Christi glorificat omnipotentiam.

13. Victus non valuit insatiabilis,
Saevus, terribilis, et nova cogitat
Tormenta sitiens vincere martyrem;
Sed sanctum Domini non terruit malum.

14. Exaudi, Domine, cogitat impius
Inferre onera, vincula omnia,
Ferventem oleum, plumbum et ungulas,
Ut sanctum superet martyrem et necet.

15. Ne, Thyrse, timeas, 6ic ait angelus,
Directus ego sum a Domino Deo,
A te supplicia auferam omnia,
Hostemque poteris vincere pessimum.

16. Cernens proficere nil suis viribus

Sanctum praecipitem in mare praecipit
Iactare, videant ne oculi hominum,
Ter dena stadia a litore longius.

17. Quam mira, Domine, sunt opera tua!
Adducunt manibus martyrem angeli
Et dulci resonant carmine canticum,
Iudex non meruit cernere angelos.

18. Debemus penitus facta retexere,
Quae sanctus meritis reddiderit bona
Tribus iudicibus culpa labentibus,
Quos terra reppulit mortuos saepius.

19. Exorant populi martyrem, inquiunt:
Oramus, domine, praecipe protinus,
Terra ut suscipiat corpora iudicum,
Quae scatent putrida vermibus funditus.

20. Clementer lacrimans sarculum accipit
Designans locum, ubi corpora condere
Deberent. Veniam da pie, poscimus,
Martyr, nos humiles credimus in Deum.

21. Laetentur omnium corda volentium
Caelestis patriae quaerere gaudia,
Et parvi faciant nulla nocentia,
Ut venti a facie stipula pervolent.

22. Te martyr lacrimis vernule poscimus,
Per te omnipotens conditor ocius
Durum, quo premimur, hoc iugum auferat
Et laetos faciat saecla in omnia.

23. Iam, summe Domine, respice saucium
Delictis, populi dele chirographum,
Et nostrum gemitum cerne propitius
Dans nobis auxilium tempore congruo.

24. Defunctis requiem omnibus, optime,
Concede, tempora prospera tribue,
Victum pauperibus, subsidium viduis,
Omnes percipiant, quod pie postulant.

25. Templum hoc, Domine, Cixilla condidit,
Dignam hic habeat sortem in aethera,
Cum summis civibus cantica praecinat
Gaudens perpetuis saeculis omnibus.

26. Te nostra iubilet gloria perpetim,
Qui solus Dominus trinus et unus es
Iugi imperio saecula continens
Et cuncta dominans, omnibus imperans.